കോഴിക്കോട്: ജില്ലയില്‍ ഓപ്പറേഷന്‍ സുലൈമാനി പദ്ധതി വിപുലീകരിക്കുമെന്ന് ജില്ലാ കലക്ടര്‍ യു.വി ജോസ്. കലക്ടറുടെ ചേംബറില്‍ ചേര്‍ന്ന പദ്ധതി അവലോകന യോഗത്തിലാണ് തീരുമാനം.
ജില്ലയിലെ 120 ഹോട്ടലുകളിലൂടെയാണ് ഇപ്പോള്‍ പദ്ധതി നടപ്പിലാക്കുന്നത്. രാമനാട്ടുകരയിലും കൂടരഞ്ഞിയിലും പുതിയ സബ് യൂനിറ്റുകള്‍ ആരംഭിക്കും.
നഗരത്തിലും കുറ്റ്യാടി, ബാലുശേരി, വടകര മേഖലയിലും ഇപ്പോള്‍ സബ് യൂനിറ്റുകള്‍ പ്രവര്‍ത്തിക്കുന്നുണ്ട്.
പദ്ധതിയുടെ നടത്തിപ്പിനായി കൂടുതല്‍ കൗണ്ടറുകള്‍ സ്ഥാപിക്കും. പൊലിസിന്റെ പങ്കാളിത്തം ഉള്‍പ്പെടുത്താനായി കമ്മിഷനറുമായി ചര്‍ച്ച നടത്താനും യോഗത്തില്‍ തീരുമാനമായി. പദ്ധതിയുടെ വിലയിരുത്തലിനായി എല്ലാ മാസവും അവസാനത്തെ ശനിയാഴ്ചകളില്‍ യോഗം ചേരും.
ഈ മാസത്തെ അവലോകന യോഗം റഹ്മത്ത് ഹോട്ടലില്‍ 25ന് വൈകിട്ട് 6.30ന് ചേരാനും തീരുമാനിച്ചു.
കേരള ഹോട്ടല്‍ ആന്‍ഡ് റസ്റ്റോറന്റ് അസോസിയേഷന്‍ ജില്ലാ പ്രസിഡന്റ് ടി.വി സുഹൈല്‍, സെക്രട്ടറി എന്‍. സുഗുണന്‍, ഇന്‍സ്റ്റിറ്റ്യൂട്ട് ഓഫ് പാലിയേറ്റീവ് മെഡിക്കല്‍ ഡയറക്ടര്‍ ഡോ.സുരേഷ് കുമാര്‍ യോഗത്തില്‍ പങ്കെടുത്തു.