നരിക്കുനി: കെ.എസ്.ഇ.ബി ഓഫിസേഴ്‌സ് അസോസിയേഷന്റെ സഹായത്തോടെ നിര്‍ധന കുടുംബത്തിന് വൈദ്യുതി കണക്ഷന്‍ ലഭിച്ചു. പുന്നശ്ശേരി എ.എം.യു.പി സ്‌കൂളില്‍ പഠിക്കുന്ന നരിക്കുനി ഓടുപാറ പൈക്കാട്ട് മീത്തല്‍ ശ്രീധരന്റെ മകന്‍ അര്‍ജുനിന്റെ ഗൃഹസന്ദര്‍ശന വേളയിലാണ് കുടുംബത്തിന്റെ ദുരവസ്ഥ അധ്യാപകര്‍ മനസിലാക്കിയത്. തുടര്‍ന്ന് കെ.എസ്.ഇ.ബി ഓഫിസേഴ്‌സ് അസോസിയേഷന്‍ പ്രവര്‍ത്തകരെ വിവരം അറിയിക്കുകയും അവര്‍ സൗജന്യ വയറിങ് നടത്തുകയും ചെയ്തു.
നരിക്കുനി സെക്ഷന്‍ ഓഫിസിലെ ജീവനക്കാര്‍ നാലു വൈദ്യുതിക്കാല്‍ സ്ഥാപിച്ചാണ് കണക്ഷന്‍ നല്‍കിയത്. കെ.എസ്.ഇ.ബി ഓഫിസേഴ്‌സ് അസോസിയേഷന്‍ ഇതിനകം 40 വീടുകള്‍ക്ക് സൗജന്യ വയറിങ് നടത്തി വൈദ്യുതി കണക്ഷന്‍ നല്‍കിയിട്ടുണ്ട്. വൈദ്യുതിയുടെ സ്വിച്ച് ഓണ്‍ കര്‍മം എന്‍.ഇ സലിം നിര്‍വഹിച്ചു. ചടങ്ങില്‍ സി. മോഹനന്‍ അധ്യക്ഷനായി. ഇ. ശശീന്ദ്രന്‍ റിപ്പോര്‍ട്ട് അവതരിപ്പിച്ചു. ശിവാനന്ദന്‍, സനല്‍ മാസ്റ്റര്‍, സുബൈര്‍ മുഹമ്മദ് ഷഹീര്‍, ഷിബിന്‍ലാല്‍ സംസാരിച്ചു.