നെല്ലാക്കോട്ട: നെല്ലാക്കോട്ടയില്‍ രണ്ട് പശുക്കളെ കടുവ കടിച്ച് കൊന്നു. നെല്ലാകോട്ടയിലെ മൈമൂന എന്ന സ്ത്രീയുടെ പശുക്കളെയാണ് കടുവ കൊന്നനിലയില്‍ കണ്ടെത്തിയത്.
കഴിഞ്ഞ ദിവസം വൈകിട്ടാണ് പശുക്കളെ കാണാതായത്. തുടര്‍ന്ന് അന്വേഷണം നടത്തിയെങ്കിലും രാത്രി വൈകിയും പശുക്കളെ കണ്ടത്താനായില്ല. പിന്നീട് നാട്ടുകാര്‍ രാവിലെ നടത്തിയ അന്വേഷണത്തിലാണ് വീടിന് സമീപത്ത് നിന്നും 800 മീറ്റര്‍ അകലെ പശുക്കളെ ചത്തനിലയില്‍ കണ്ടെത്തിയത്.
സമീപത്ത് കടുവയുടെ കാല്‍ പാടുകള്‍ കണ്ടതോടെ നാട്ടുകാര്‍ വനം വകുപ്പിന് വിവരം അറിയിക്കുകയായിരുന്നു. തുടര്‍ന്ന് ബിതൃക്കാട് റെയ്ഞ്ചര്‍ മനോഹരന്റെ നേതൃത്വത്തിലുള്ള വനപാലക സംഘം സ്ഥലത്തെത്തി പരിശോധന നടത്തി.
പശുക്കളെ കൊന്നത് കടുവ തന്നെയാണന്നാണ് വനം വകുപ്പിന്റെ നിഗമനം. ഇതെതുടര്‍ന്ന് പ്രദേശത്ത് വനം വകുപ്പ് നാല് കാമറകള്‍ സ്ഥാപിച്ചു. കഴിഞ്ഞ രണ്ട് വര്‍ഷത്തിനിടെ 40 പശുക്കളാണ് നെല്ലാക്കോട്ട മേഖലയില്‍ കടുവ, പുലി എന്നിവയുടെ ആക്രമണത്തില്‍ കൊല്ലപ്പെട്ടത്.