ജൊഹന്നാസ്ബര്‍ഗ്: ആധുനിക ക്രിക്കറ്റിലെ പ്രതിഭാധനനായ ബാറ്റ്‌സ്മാന്‍മാരില്‍ മുന്നില്‍ നില്‍ക്കുന്ന ദക്ഷിണാഫ്രിക്കന്‍ സൂപ്പര്‍ താരം എ.ബി ഡിവില്ല്യേഴ്‌സ് അന്താരാഷ്ട്ര ക്രിക്കറ്റില്‍ നിന്ന് വിരമിച്ചു. ഐ.പി.എല്‍ 11ാം സീസണില്‍ റോയല്‍ ചലഞ്ചേഴ്‌സ് ബാംഗ്ലൂരിന് കളിച്ച ഡിവില്ല്യേഴ്‌സ് ടീം ആദ്യ റൗണ്ടില്‍ തന്നെ പുറത്തായതിനെ തുടര്‍ന്ന് നാട്ടിലേക്ക് മടങ്ങിയിരുന്നു. പിന്നാലെയാണ് 34കാരനായ താരം ക്രിക്കറ്റ് പ്രേമികളെ ഞെട്ടിക്കുന്ന തീരുമാനം പ്രഖ്യാപിച്ചത്.
114 ടെസ്റ്റുകളും 228 ഏകദിനങ്ങളും 78 ടി20 മത്സരങ്ങളും ദക്ഷിണാഫ്രിക്കയ്ക്കായി കളിച്ചിട്ടുള്ള ഡിവില്ല്യേഴ്‌സ് മൂന്ന് വിഭാഗത്തിലും വര്‍ത്തമാന ക്രിക്കറ്റിലെ ഏറ്റവും മികച്ച ബാറ്റിങ് പ്രതിഭയായി വിലയിരുത്തപ്പെടുന്നു. മൂന്ന് വിഭാഗത്തിലുമായി 20,014 റണ്‍സാണ് സമ്പാദ്യം. ദക്ഷിണാഫ്രിക്കയ്ക്കായി ടെസ്റ്റില്‍ ഏറ്റവും കൂടുതല്‍ റണ്‍സെടുത്ത താരങ്ങളുടെ പട്ടികയില്‍ ഡിവില്ല്യേഴ്‌സ് നാലാം സ്ഥാനത്തുണ്ട്. ടെസ്റ്റില്‍ 50.66 ശരാശരിയില്‍ 8765 റണ്‍സ് നേടി. 54.51 സ്‌ട്രൈക്ക് റേറ്റില്‍ 22 സെഞ്ച്വറികളും 46 അര്‍ധ സെഞ്ച്വറികളുമാണ് ടെസ്റ്റിലെ നേട്ടം. 278 റണ്‍സാണ് ഉയര്‍ന്ന സ്‌കോര്‍.
ഏകദിനത്തില്‍ 9473 റണ്‍സാണ് എ.ബി.ഡി അടിച്ചെടുത്തത്. ഏകദിനത്തില്‍ ദക്ഷിണാഫ്രിക്കയ്ക്കായി ഏറ്റവും കൂടുതല്‍ റണ്‍സെടുത്ത താരങ്ങളില്‍ രണ്ടാമതുള്ള ഡിവില്ല്യേഴ്‌സ് ടി20യില്‍ 1672 റണ്‍സാണ് കണ്ടെത്തിയിട്ടുള്ളത്. ടി20യില്‍ ഏറ്റവും കൂടുതല്‍ റണ്‍സെടുത്ത ദക്ഷിണാഫ്രിക്കന്‍ താരങ്ങളില്‍ മുന്‍ ക്യാപ്റ്റന്‍ രണ്ടാമത് നില്‍ക്കുന്നു. ഏകദിനത്തില്‍ 53.50 റണ്‍സ് ശരാശരിയില്‍ 101.09 സ്‌ട്രൈക്ക് റേറ്റില്‍ 25 സെഞ്ച്വറികളും 53 അര്‍ധ സെഞ്ച്വറികളും നേടിയ എ.ബി.ഡിയുടെ ഉയര്‍ന്ന സ്‌കോര്‍ 176 റണ്‍സ്.
ടി20യില്‍ 135.16 സ്‌ട്രൈക്ക് റേറ്റില്‍ പത്ത് അര്‍ധ സെഞ്ച്വറികളാണ് താരം കുറിച്ചത്. 79 റണ്‍സാണ് ഉയര്‍ന്ന സ്‌കോര്‍. 2004ല്‍ ഇംഗ്ലണ്ടിനെതിരേയാണ് ടെസ്റ്റിലെ അരങ്ങേറ്റം. ഇംഗ്ലണ്ടിനെതിരേ തന്നെ 2005ല്‍ ഏകദിനത്തില്‍ അരങ്ങേറിയ ഡിവില്ല്യേഴ്‌സ് 2006ല്‍ ആസ്‌ത്രേലിയക്കെതിരേയാണ് ടി20യിലെ കന്നി അന്താരാഷ്ട്ര പോരിനിറങ്ങിയത്. താന്‍ ക്ഷീണിതനാണെന്ന് പറഞ്ഞാണ് താരം വിരമിക്കല്‍ പ്രഖ്യാപിച്ചത്. മറ്റുള്ളവര്‍ക്കായി മാറിക്കൊടുക്കാനുള്ള സമയമായിരിക്കുന്നു. കഠിനമായ തീരുമാനമാണിത്. മികവില്‍ നില്‍ക്കുമ്പോള്‍ തന്നെ വിട പറയുകയാണ് ഉചിതമെന്ന് പറഞ്ഞ ഡിവില്ല്യേഴ്‌സ് ഇന്ത്യ, ആസ്‌ത്രേലിയ ടീമുകള്‍ക്കെതിരായ പരമ്പര വിജയവും ചൂണ്ടിക്കാട്ടി. കരിയറില്‍ ഉടനീളം പിന്തുണച്ച ദക്ഷിണാഫ്രിക്കയുടെ പരിശീലകന്‍മാര്‍, മറ്റ് ടീം അധികൃതര്‍ എല്ലാവര്‍ക്കും നന്ദി പറയുന്നതായി അദ്ദേഹം വ്യക്തമാക്കി. ഏറ്റവും കടപ്പെട്ടിരിക്കുന്നത് സഹ താരങ്ങളോടാണ്. അവരുടെ പിന്തുണയില്ലായിരുന്നുവെങ്കില്‍ മികവിലേക്ക് ഉയരാന്‍ സാധിക്കില്ലായിരുന്നു.
താരമെന്ന നിലയില്‍ ഉള്‍ക്കൊണ്ടതിനും മഹാമനസ്‌കതയോടെ കണ്ടതിനും ദക്ഷിണാഫ്രിക്കയിലേയും ലോകമെമ്പാടുമുള്ള ക്രിക്കറ്റ് പ്രേമികളോടും നന്ദിയുണ്ട്. ഭാവിയെ കുറിച്ച് ചിന്തിച്ചിട്ടില്ല. ഡൊമസ്റ്റിക്ക് ടീമായ ടൈറ്റന്‍സിനൊപ്പം കളി തുടരുമെന്ന് ഡിവില്ല്യേഴ്‌സ് വ്യക്തമാക്കി.