പയ്യന്നൂര്‍: പയ്യന്നൂരില്‍ ചൊവ്വാഴ്ച അരങ്ങേറിയ അക്രമസംഭവങ്ങളില്‍ ബി.ജെ.പി പ്രവര്‍ത്തകരുടെ പരാതിയില്‍ പൊലിസ് രണ്ടു കേസുകള്‍ രജിസ്റ്റര്‍ചെയ്തു. ബി.ജെ.പി മണ്ഡലം കമ്മിറ്റി ഓഫിസായ മാരാര്‍ജി മന്ദിരത്തിനു ബോംബെറിഞ്ഞെന്ന മണ്ഡലം പ്രസിഡന്റ് ടി. രാമകൃഷ്ണന്റെ പരാതിയില്‍ ബൈക്കിലെത്തിയ ഒരുസംഘം ആളുകള്‍ക്കെതിരേയും ബി.ജെ.പി പ്രവര്‍ത്തകന്‍ താലൂക്ക് ആശുപത്രിക്കു സമീപത്തെ ഇട്ടമ്മല്‍ രജിത്തിനെ(34) മര്‍ദിച്ച സംഭവത്തില്‍ സി.പി.എം പ്രവര്‍ത്തകരായ നിഖില്‍, കപില്‍, പ്രസന്നന്‍ എന്നിവരുള്‍പ്പെടെ 23 പേര്‍ക്കെതിരേ വധശ്രമത്തിനും രജിത്തിന്റെ മൂന്നരപവനോളം തൂക്കംവരുന്ന സ്വര്‍ണമാല പൊട്ടിച്ചെടുത്തതിനുമാണു കേസെടുത്തത്.
അതേസമയം സംഘര്‍ഷത്തിനു തുടക്കംകുറിച്ച സി.പി.എം പ്രവര്‍ത്തകന്‍ കോറോത്തെ ഡി. ഷിനുവിനെ ആക്രമിച്ചുവെന്ന പരാതിയില്‍ ദുരൂഹതയുണ്ടെന്നു പൊലിസ് അറിയിച്ചു. പുതിയ ബസ്സ്റ്റാന്‍ഡിനടുത്ത സ്റ്റേഡിയം റോഡിലൂടെ ബൈക്കില്‍ യാത്രചെയ്യവേ കാറിലെത്തിയ സംഘം തടഞ്ഞുനിര്‍ത്തുകയും വടിവാള്‍ വീശി ആക്രമിക്കാന്‍ ശ്രമിക്കുകയും ചെയ്തുവെന്നായിരുന്നു പരാതി. ഓടിരക്ഷപ്പെടാന്‍ ശ്രമിക്കുന്നതിനിടെ കുഴഞ്ഞവീണ ഷിനുവിനെ സഹകരണ ആശുപത്രിയില്‍ തീവ്രപരിചരണ വിഭാഗത്തില്‍ പ്രവേശിപ്പിച്ചിരുന്നു.
എന്നാല്‍ പൊലിസിനു നല്‍കിയ മൊഴിയില്‍ ഒരാള്‍ വാള്‍വീശി ഉയര്‍ത്തിപ്പിടിക്കുന്നതു കണ്ടുവെന്നും ഭയന്നോടിയ തനിക്കു നെഞ്ചുവേദന അനുഭവപ്പെട്ടാണ് ആശുപത്രിയില്‍ പ്രവേശിപ്പിച്ചതെന്നുമാണ് പറഞ്ഞത്. ഈ മൊഴി അനുസരിച്ച് കേസെടുക്കാന്‍ സാധിക്കില്ലെന്നും വിശദമായ മൊഴിയെടുപ്പിനും അന്വേഷണത്തിനും ശേഷമേ കേസെടുക്കുന്ന കാര്യം ആലോചിക്കൂവെന്ന നിലപാടിലാണു പൊലിസ്. ഷിനുവിനെ ചോദ്യംചെയ്യാന്‍ പൊലിസ് തയാറാവണമെന്നു ബി.ജെ.പി നേതാക്കള്‍ നേരത്തെ ആവശ്യപ്പെട്ടിരുന്നു.