ജിദ്ദ: സഊദിയില്‍ വിദേശികള്‍ക്ക് സ്വന്തം നിലയില്‍ ബിസിനസ് ചെയ്യുന്നതിനുള്ള അവസരമൊരുക്കുന്നതിന് വ്യവസ്ഥകളില്‍ ഇളവ് വരുത്തുന്നത് സംബന്ധിച്ച് പഠനം നടത്തുന്നതായി വാണിജ്യ നിക്ഷേപ മന്ത്രാലയ വൃത്തങ്ങള്‍ അറിയിച്ചു. എന്നാല്‍ ഇതു നടപ്പാക്കുമെന്ന വാര്‍ത്ത മന്ത്രാലയം നിഷേധിച്ചു. സ്‌പോണ്‍സര്‍മാരെ ആശ്രയിക്കാതെ സ്വതന്ത്രമായി നിക്ഷേപം നടത്താന്‍ വിദേശികള്‍ക്ക് ഉടന്‍ അനുമതി നല്‍കുന്നുവെന്ന തരത്തില്‍ മാധ്യമങ്ങള്‍ വഴി വന്ന വാര്‍ത്തയുടെ പശ്ചാത്തലത്തിലാണ് മന്ത്രാലയം വിശദീകരണവുമായി രംഗത്തുവന്നത്. നിലവില്‍ സ്വദേശി പൗരന്മാര്‍ക്കല്ലാതെ സഊദിയില്‍ സ്വതന്ത്രമായി ജോലി ചെയ്യാന്‍ അനുവാദമില്ല. എങ്കിലും വിദേശികള്‍ക്ക് സ്വതന്ത്രമായി നിക്ഷേപം നടത്താന്‍ അവസരം ഒരുക്കുന്നതിന് നിലവിലുള്ള വ്യവസ്ഥകളില്‍ ചില ഭേദഗതികള്‍ വരുത്തി ലഘൂകരിക്കുന്നത് സംബന്ധിച്ച് പഠിക്കുന്നുണ്ട്.

രാജ്യം അഭിമുഖീകരിക്കുന്ന വലിയ ഭീഷണിയായ ബിനാമി വ്യവസായ പ്രവണതക്ക് തടയിടുന്നതിനാണ് ഇക്കാര്യം പഠന വിധേയമാക്കുന്നത്.
ദേശീയ സമ്പദ് വ്യവസ്ഥക്ക് മുതല്‍ക്കുട്ടാകുന്ന നിരവധി മേഖലകളല്‍ വിദേശ നിക്ഷേപകര്‍ക്ക് ലൈസന്‍സ് നല്‍കുന്നതിന് മന്ത്രാലയം താത്പര്യം പ്രകടിപ്പിക്കുന്നുണ്ട്.
വര്‍ഷത്തില്‍ 20 ശതമാനം വരെ നികുതി നല്‍കി സ്‌പോണ്‍സര്‍ഷിപ്പിന് കീഴിലല്ലാതെ ജോലി ചെയ്യാന്‍ വിദേശികളെ അനുവദിക്കുന്നതിന് മന്ത്രാലയം ആലോചിക്കുന്നതായാണ് വാര്‍ത്ത പ്രചരിച്ചിരുന്നത്.