ന്യൂഡല്‍ഹി: നിരോധിക്കപ്പെട്ട നോട്ടുകള്‍ മാറാന്‍ മാര്‍ച്ച് 31വരെ സമയം നല്‍കുമെന്ന പ്രധാനമന്ത്രി നരേന്ദ്രമോദിയുടെ പ്രഖ്യാപനം എന്തുകൊണ്ടാണ് പാലിക്കാത്തതെന്ന വിവരാകാശ പ്രകാരമുള്ള അപേക്ഷ റിസര്‍വ് ബാങ്ക് നിരസിച്ചു. ചോദ്യം വിവരാവകാശ നിയമത്തിന്റെ പരിധിയില്‍ വരില്ലെന്ന് ചൂണ്ടിക്കാട്ടിയാണ് അപേക്ഷ നിരസിച്ചത്. 2016 നവംബര്‍ എട്ടിന് 1000, 500 രൂപ നോട്ടുകള്‍ നിരോധിച്ച് പ്രധാനമന്ത്രി നരേന്ദ്രമോദി നടത്തിയ പ്രസംഗത്തിലാണ് മാര്‍ച്ച് 31 വരെ നോട്ടുകള്‍ മാറാന്‍ സമയമുണ്ടെന്ന് പ്രഖ്യാപിച്ചിരുന്നത്. എന്നാല്‍ റിസര്‍വ് ബാങ്ക് സമയം വെട്ടിച്ചുരുക്കുകയും മാര്‍ച്ച് 31 വരെ നോട്ടുമാറാനുള്ള അനുമതി വിദേശഇന്ത്യക്കാര്‍ക്ക് മാത്രമാക്കി പരിമിതപ്പെടുത്തുകയുമായിരുന്നു.
ഇത് സംബന്ധിച്ച ചോദ്യങ്ങള്‍ക്ക് മറുപടി നല്‍കുന്നത് രാജ്യത്തിന്റെ സാമ്പത്തിക താല്‍പര്യത്തിന് വിരുദ്ധമാണെന്നാണ് അപേക്ഷ തള്ളിക്കൊണ്ടുള്ള കത്തില്‍ ആര്‍.ബി.ഐ വ്യക്തമാക്കിയത്. ഇത്തരം കാര്യങ്ങള്‍ വിവരാവകാശ നിയമത്തിന്റെ പരിധിയില്‍ വരില്ലെന്നാണ് ബാങ്കിന്റെ വിവരാവകാശ ഓഫിസര്‍ സുമന്‍ റോയ് പറയുന്നത്.