മലമ്പുഴ : ഉദ്യാനത്തില്‍ കുട്ടികള്‍ക്ക് കളിക്കാനുള്ള ഉപകരണങ്ങള്‍ തുരുമ്പെടുത്ത് തകര്‍ന്നിട്ടും അധികൃതര്‍ക്ക് മൗനം. തകര്‍ന്ന കളിയുപകരണങ്ങള്‍ കുട്ടികള്‍ക്ക് ഭീഷണിയാകുന്നു. ഫൈബറിലും ഇരുമ്പിലും തീര്‍ത്ത പലതരത്തിലുള്ള തെന്നിയിറങ്ങല്‍ കളിക്കോപ്പുകള്‍ ഉദ്യാനത്തിലുണ്ട്. ഇവയെല്ലാം ഇപ്പോള്‍ ഓട്ടവീണ നിലയിലാണ്. മുകളില്‍നിന്ന് കുട്ടികള്‍ താഴേക്ക് ഊര്‍ന്നിറങ്ങുമ്പോള്‍ കുട്ടികളുടെ കാലുകള്‍ ഇതില്‍ കുരുങ്ങുകയാണ്. നിരവധി കുട്ടികള്‍ക്കാണ് ഇത്തരത്തില്‍ കാലിന് പരുക്ക് പറ്റുന്നത്.
തകര്‍ന്നു കിടക്കുന്നത് കളിക്കോപ്പിന്റെ മുകള്‍ഭാഗത്തായതിനാല്‍ രക്ഷിതാക്കള്‍ക്ക് കാണാനും കഴിയില്ല. കൂടാതെ ഉദ്യാനത്തിനകത്ത് പല ഉപകരണങ്ങളും പ്രവര്‍ത്തിക്കാതെ കിടക്കുന്നുമുണ്ട്.
മുമ്പ് നെഹ്‌റു പാര്‍ക്കിന് സമീപത്ത് ഊഞ്ഞാലുണ്ടായിരുന്നെങ്കിലും ഇപ്പോള്‍ അതില്ല. സീസാകളും പലതും കൃത്യമായി പ്രവര്‍ത്തിക്കാതെ കിടക്കയാണ്. 2011 ലെ നവീകരണഭാഗമായാണ് കുട്ടികളുടെ പാര്‍ക്കിലെ കളിയുപകരണങ്ങള്‍ മാറ്റിസ്ഥാപിച്ചത്. എന്നാല്‍ ഗുണനിലവാരക്കുറവിനാല്‍ ഉപകരണങ്ങള്‍ സ്ഥാപിച്ച് രണ്ടു വര്‍ഷം കഴിയുമ്പോഴേക്കും പലതും തകര്‍ന്നു തുടങ്ങി.
ഒരു വര്‍ഷം മുമ്പ് ജലസേചനവകുപ്പ് ഇവയുടെ അറ്റകുറ്റപ്പണി നടത്തിയിരുന്നു.