പാരീസ്: യൂറോ കപ്പിലെ ആദ്യ ക്വാര്‍ട്ടര്‍ ഫൈനലില്‍ പോളണ്ടിനെതിരേ പോര്‍ച്ചുഗലിന് ജയം. ജയത്തോടെ പോര്‍ച്ചുഗല്‍ സെമിയില്‍ കടന്നു. പെനാല്‍റ്റി ഷൂട്ടൗട്ടില്‍ 5-3നാണ് പോര്‍ച്ചുഗലിന്റെ വിജയം. മല്‍സരത്തിന്റെ ആദ്യ പകുതിയില്‍ ഇരു ടീമുകളും ഓരോ ഗോളുകള്‍ വീതം നേടി സമനില പാലിച്ചു. എന്നാല്‍, രണ്ടാം പകുതിയിലും അധികസമയത്തും ഇരുടീമുകള്‍ക്കും ഗോളുകള്‍ നേടാന്‍ കഴിഞ്ഞില്ല. ഇതോടെ മല്‍സരം ഷൂട്ടൗട്ടിലേക്ക് കടക്കുകയായിരുന്നു.
പോളണ്ടിനു വേണ്ടി ക്യാപ്റ്റന്‍ ലെവന്‍ഡോവ്‌സ്‌കി കളിയുടെ രണ്ടാം മിനുറ്റില്‍ തന്നെ ആദ്യ അടി പോര്‍ച്ചുഗലിന് നല്‍കിയെങ്കിലും പോര്‍ച്ചുഗല്‍ 33ാം മിനുറ്റില്‍ സാഞ്ചസിലൂടെ തിരിച്ചടിച്ചു.

ഷൂട്ടൗട്ടില്‍ ക്രിസ്റ്റിയാനോ അടക്കമുള്ള എല്ലാവരുടെയും കിക്കുകള്‍ ലക്ഷ്യം കണ്ടു. എന്നാല്‍, പോളണ്ടിന്റെ ബ്ലാസ്‌കോവിസ്‌കിയുടെ കിക്ക് പോര്‍ച്ചുഗല്‍ ഗോളി പട്രീഷ്യോ തടഞ്ഞിട്ടതോടെ വിജയം പോര്‍ച്ചുഗലിന് സ്വന്തമായി. കളിയിലെ കേമനായി പോര്‍ച്ചുഗലിന്റെ കൗമാരതാരം റെനെറ്റോ സാഞ്ചസിനെ തെരഞ്ഞെടുത്തു.