കാട്ടാക്കട:വീരണകാവ് ചായ്ക്കുളത്ത് സി.പി.എം  ബി.ജെ.പി സംഘര്‍ഷം. നിരവധി പേര്‍ക്ക് പരുക്ക്. ഇന്നലെ രാത്രി8.45ഓടെയായിരുന്നു തുടക്കം. കീഴ്‌വാണ്ട ശിവശക്തി  ക്ഷേത്രത്തില്‍ വിറക് കൊണ്ടുപോയതുമായി ബന്ധപ്പെട്ടുണ്ടായ തര്‍ക്കമാണ് സംഘര്‍ഷത്തില്‍ കലാശിച്ചത്.  സമീപത്തെ കോളനികളിലെ വീടുകള്‍ക്ക് നേരേയും കല്ലേറുണ്ടായി. ആറോളം സി.പി.എം പ്രവര്‍ത്തകര്‍ക്കും അഞ്ച് ബി.ജെ.പി  ആര്‍.എസ്.എസ്.പ്രവര്‍ത്തകര്‍ക്കും പരുക്കേറ്റു.  സി.പി.എം.പ്രവര്‍ത്തകരായ മിഥുന്‍,ഷിജിന്‍,പ്രദീപ്,വിശാഖ്,വിപിന്‍ എന്നിവരെ നെയ്യാറ്റിന്‍കര ജില്ലാ ആശുപത്രിയിലും ബി. ജെ .പി പ്രവര്‍ത്തകരായ രതീഷ് , പ്രശാന്ത് , വിഷ്ണു തുടങ്ങി  ബി.ജെ.പി പ്രവര്‍ത്തകരെ കാട്ടാക്കട കമ്മ്യൂണിറ്റി ഹെല്‍ത്ത് സെന്ററിലും പ്രവേശിപ്പിച്ചു.
സംഭവസ്ഥലത്ത് വച്ച് പരുക്കേറ്റ ഷൈലജ(50),ഉഷ(45)  എന്നീ സ്ത്രീകളെ ജനറല്‍ ആശുപത്രിയിലും പ്രവേശിപ്പിച്ചു.
രാത്രി 11 മണികഴിഞ്ഞും സ്ഥലത്തു സംഘര്‍ഷാവസ്ഥയാണ്.  റൂറല്‍ എസ്.പി. അശോക് കുമാറിന്റെ നേതൃത്വത്തിലുള്ള വന്‍ പൊലിസ് സംഘം സ്ഥലത്ത് ക്യാംപ് ചെയ്യുന്നുണ്ട്.