ജിദ്ദ: വിശുദ്ധ ഹറമിനു സമീപം മിസ്ഫലയില്‍ ഉംറ തീര്‍ഥാടകര്‍ കഴിയുന്ന ഹോട്ടലില്‍ അഗ്നിബാധ. ഞായറാഴ്ച രാത്രിയാണ് ഇബ്രാഹിം അല്‍ഖലീല്‍ സ്ട്രീറ്റിലെ പത്തു നില ഹോട്ടലില്‍ തീപ്പിടിത്തമുണ്ടായത്. ഈ സമയത്ത് കെട്ടിടത്തിലുണ്ടായിരുന്ന 500 ഓളം പേരെ സിവില്‍ ഡിഫന്‍സ് ഒഴിപ്പിച്ചു.

ഹോട്ടലിലെ ഏതാനും കട്ടിലുകളിലാണ് തീ പടര്‍ന്നുപിടിച്ചത്. സിവില്‍ ഡിഫന്‍സ് യൂനിറ്റുകള്‍ തീയണച്ചു. അഗ്നിബാധയെ കുറിച്ച് ഞായറാഴ്ച രാത്രി 10.40 ന് ആണ് സിവില്‍ ഡിഫന്‍സ് കണ്‍ട്രോള്‍ റൂമില്‍ വിവരം ലഭിച്ചതെന്ന് മക്ക പ്രവിശ്യ സിവില്‍ ഡിഫന്‍സ് വക്താവ് കേണല്‍ സഈദ് സര്‍ഹാന്‍ പറഞ്ഞു. ആര്‍ക്കും പരിക്കില്ലെന്നും സിവില്‍ ഡിഫന്‍സ് വക്താവ് പറഞ്ഞു.