മുംബൈ: വിമാനത്തിലെ സീറ്റു തര്‍ക്കത്തിന്റെ പേരില്‍ മലയാളിയായ എയര്‍ ഇന്ത്യ ജീവനക്കാരനെ ചെരുപ്പൂരിയടിച്ച ശിവസേന എംപി രവീന്ദ്ര ഗെയ്ക്കവാദിനു എയര്‍ ഇന്ത്യ വീണ്ടും ടിക്കറ്റ് നിഷേധിച്ചു.

മുംബൈയില്‍നിന്നു ഡല്‍ഹിയിലേക്ക് ഗെയ്ക്കവാദ് ബുക്ക് ചെയ്ത ടിക്കറ്റാണ് കമ്പനി റദ്ദാക്കിയത്. രണ്ടാം തവണയാണ് തങ്ങളുടെ ജീവനക്കാരനെ മര്‍ദ്ദിച്ച സംഭവത്തില്‍ എയര്‍ ഇന്ത്യ എംപിക്കു ടിക്കറ്റ് നിഷേധിക്കുന്നത്.

ഗെയ്ക്കവാദിനെ എയര്‍ ഇന്ത്യ കരിമ്പട്ടികയില്‍ പെടുത്തിയിരുന്നു. മറ്റ് ആറ് എയര്‍ലൈന്‍ സര്‍വിസുകളും എംപിക്ക് ടിക്കറ്റ് നിഷേധിച്ചിരുന്നു.

അതിനിടെ എയര്‍ലൈന്‍ കമ്പനികളുടെ പ്രതിഷേധം നേരിടാന്‍ കേന്ദ്രം നിയമം പൊളിച്ചെഴുതാന്‍ തയാറെടുക്കുന്നുണ്ട്. സിവില്‍ ഏവിയേഷന്‍ റിക്വയര്‍മെന്റ് റൂളില്‍ ഭേദഗതി വരുത്താനാണ് നീക്കം. വിമാനത്തില്‍ പ്രശ്‌നമുണ്ടാക്കുന്നവര്‍ക്കെതിരേ നടപടിയെടുക്കുന്നത് ഈ നിയമം ഉപയോഗിച്ചാണ്. ഇതില്‍ നിയന്ത്രണം വരുത്തി എംപിക്ക് വിമാനയാത്ര സുഗമമാക്കാനാണ് സര്‍ക്കാര്‍ നീക്കം.