വടക്കാഞ്ചേരി : വിരിപ്പ് കൃഷിയുടെ കാര്‍ഷിക സമൃദ്ധിയിലേക്കു വടക്കാഞ്ചേരി നഗരസഭയിലെ എങ്കക്കാട് കിഴക്കേ പാടശേഖരം. ഇടവപ്പാതിയില്‍ തകര്‍ത്തു പെയ്യുന്ന മഴയെ അവഗണിച്ചു കാര്‍ഷിക മുന്നേറ്റത്തിന്റെ പതാകവാഹകരാവുകയാണു പാടശേഖരത്തിലെ കര്‍ഷകര്‍.
മണ്ണുത്തി കാര്‍ഷിക സര്‍വകലാശാലയില്‍ നിന്നു പരിശീലനം പൂര്‍ത്തിയാക്കിയ വിദ്യാര്‍ഥികളുടെ സഹായത്തോടെയാണു പാടശേഖരം ഇത്തവണ കാര്‍ഷിക പ്രയാണത്തിലേക്കു പച്ചപ്പണിയുന്നത്. യുവകര്‍ഷകന്‍ നാസര്‍ മങ്കരയുടെയും പോള്‍ പുത്തൂരിന്റേയും നൂറു ഏക്കര്‍ കൃഷിയിടത്തില്‍ ഇന്നലെ ഉത്സവ നിറവില്‍ കൃഷിയിറക്കല്‍ നടന്നു. പായ ഞാറ്റടിയിലൂടെ തയ്യാറാക്കിയ ഞാര്‍ കുബോട്ട മെഷീന്റെ സഹായത്തോടെയാണു നട്ടത്. സാധാരണ ഗതിയില്‍ ജൂണ്‍, ജൂലായ് മാസങ്ങളിലാണു കൃഷിയിറക്കാറുള്ളതെങ്കിലും ഇത്തവണ കാലവര്‍ഷം നേരത്തെയെത്തിയതും പാടശേഖരങ്ങള്‍ ജല സമൃദ്ധമായതുമാണു കൃഷിയും നേരത്തെയാക്കിയത്. മഴ പ്രളയമാകുമോ എന്ന ആശങ്ക കൃഷികാര്‍ക്കുണ്ടെങ്കിലും എല്ലാറ്റിനേയും അതിജീവിക്കാമെന്നതു പ്രതീക്ഷയാണ്. ഓണത്തിനു മുന്‍പ് വിളവെടുക്കാമെന്ന ആത്മവിശ്വാസവും കര്‍ഷകര്‍ വെച്ചു പുലര്‍ത്തുന്നു.