ബദിയടുക്ക: വിദ്യാര്‍ഥിനികളെ ലൈംഗികമായി പീഡിപ്പിക്കാന്‍ ശ്രമിച്ച കേസില്‍ സ്‌കൂള്‍ അധ്യാപകനെതിരേ ബദിയടുക്ക പൊലിസ് കേസെടുത്തു. സീതാംഗോളിക്ക് സമീപം കട്ടത്തടുക്കയിലെ അബൂബക്കറിനെതിരേയാണ് കേസ്.
15 ദിവസം മുന്‍പ് ബദിയടുക്കയിലെ ഒരു സ്‌കൂളിലെ അഞ്ചും ആറും ക്ലാസുകളില്‍ പഠിക്കുന്ന അഞ്ചുവിദ്യാര്‍ഥിനികളെ ലൈംഗികമായി പീഡിപ്പിക്കാന്‍ ശ്രമിച്ചുവെന്നാണ് കേസ്. സ്‌കൂള്‍ പരാതിപ്പെട്ടിയില്‍ വിദ്യാര്‍ത്ഥിനികള്‍ എഴുതിയിട്ട പരാതി പ്രധാന അധ്യാപകന്‍ ചൈല്‍ഡ്‌ലൈന് കൈമാറുകയായിരുന്നു.
തുടര്‍ന്ന് സംഭവത്തില്‍ അന്വേഷണം നടത്തണമെന്ന് ആവശ്യപ്പെട്ട് ചൈല്‍ഡ്‌ലൈന്‍ പ്രവര്‍ത്തകര്‍ പൊലിസിനെ സമീപിച്ചു. പൊലിസ് വിദ്യാര്‍ഥിനികളില്‍നിന്നു തെളിവെടുപ്പ് നടത്തിയശേഷമാണ് കേസ് രജിസ്റ്റര്‍ ചെയ്തത്.