പാലക്കാട്: ജില്ലയില്‍ നിപ്പ പടരുകയാണെങ്കില്‍ നേരിടാനുള്ള എല്ലാ ഒരുക്കങ്ങളും സജ്ജീകരിച്ചതായി ഡെപ്യൂട്ടി ഡി.എം.ഒ ഡോ.കെ.എ.നാസര്‍ പറഞ്ഞു. ഇതുവരെ ജില്ലയില്‍ നിപാ റിപ്പോര്‍ട്ട് ചെയ്തിട്ടില്ല. സാമൂഹിമാധ്യമങ്ങളിലൂടെ നിപാ പടര്‍ന്നതായുള്ള വ്യാജസന്ദേശങ്ങളാണ് പ്രചരിക്കുന്നതെന്നും അദ്ദേഹം പറഞ്ഞു.
മഴക്കാലപൂര്‍വ ശുചീകരണ പ്രവര്‍ത്തനങ്ങള്‍ ആസൂത്രണം ചെയ്യുന്നതിനും പുരോഗതി വിലയിരുത്തുന്നതിനുമായി ചേര്‍ന്ന തദ്ദേശസ്വയംഭരണ സ്ഥാപനങ്ങളുടെ യോഗത്തിലാണ് ഇക്കാര്യം അറിയിച്ചത്. എല്ലാ വാര്‍ഡുകളിലേയും ശുചീകരണ പ്രവര്‍ത്തനങ്ങള്‍ ഉടന്‍ പൂര്‍ത്തിയാക്കണമെന്ന് തദ്ദേശസ്വയംഭരണസ്ഥാപനങ്ങളിലെ ഉദ്യോഗസ്ഥര്‍ക്കുള്ള യോഗത്തില്‍ നിര്‍ദേശം നല്‍കി.
ജില്ലയെ മാലിന്യ-പകര്‍ച്ചവ്യാധി രഹിതമാക്കുന്നതിനുള്ള ആരോഗ്യജാഗ്രതാ കാംപെയിന്റെ ഭാഗമായി ഹരിതകേരളംമിഷന്റെ ആഭിമുഖ്യത്തില്‍ ജില്ലയില്‍ ജൂണ്‍ രണ്ട്, മൂന്ന് തിയതികളില്‍ ശുചീകരണ പ്രവര്‍ത്തനങ്ങള്‍ നടത്തും. ജൂണ്‍ രണ്ടിന് മുഴുവന്‍ ഓഫിസുകളും മൂന്നിന് പൊതുസ്ഥലങ്ങളും വീടുകളും ശുചീകരിക്കും. ഗ്രീന്‍ പ്രോട്ടോക്കോളും അജൈവ മാലിന്യ സംസ്‌കരണമൊരുക്കലും ഉള്‍പെടെയുള്ള പ്രവര്‍ത്തനങ്ങളും നടപ്പിലാക്കും. യോഗത്തില്‍ ജില്ലാ പഞ്ചായത്ത് പൊതുമരാമത്ത് സ്റ്റാന്‍ഡിങ് കമ്മിറ്റി ചെയര്‍മാന്‍ പി.കെ.സൂധാകരന്‍, പഞ്ചായത്ത് പ്രസിഡന്റ്‌സ് അസോസിയേഷന്‍ സെക്രട്ടറി സുമാവലി മോഹന്‍ദാസ്, ഹരിതകേരളം ജില്ലാ മിഷന്‍ കോഡിനേറ്റര്‍ വൈ.കല്ല്യാണകൃഷ്ണന്‍, പഞ്ചായത്ത് ഡെപ്യൂട്ടി ഡയറക്ടര്‍ ഓഫിസിലെ സീനിയര്‍ സൂപ്രണ്ട് സുരേഷ്, ശുചിത്വമിഷന്‍ പ്രോഗ്രാം ഓഫിസര്‍ ഷെരീഫ് എന്നിവര്‍ സംസാരിച്ചു.