മുംബൈ: മുംബൈയിലെ വീട്ടമ്മക്ക് 28 തവണ വന്ന ഫോണ്‍ വിളിക്കും അവര്‍ ഉത്തരം നല്‍കി. നിങ്ങളുടെ എ.ടി.എം ബ്ലോക്കായിട്ടുണ്ടെന്നും അത് ശരിയാക്കാന്‍ ഒ.ടി.പി നമ്പര്‍ അറിയിക്കണമെന്നുമായിരുന്നു വിളിച്ചവര്‍ പറഞ്ഞത്. അധികം താമസിയാതെ വീട്ടമ്മയുടെ ബാങ്ക് അക്കൗണ്ടില്‍ നിന്ന് ഏഴു ലക്ഷം രൂപ ചോര്‍ന്നു. നവിമുംബൈ സ്വദേശിനിയായ 40 കാരിക്കാണ് പണം നഷ്ടമായത്. സാങ്കേതിക തകരാര്‍ മൂലം എ.ടി.എം ബ്ലോക്കായെന്നും ഇത് ശരിയാക്കാന്‍ വിവരങ്ങള്‍ ആവശ്യമുണ്ടെന്നും പറഞ്ഞ് മെയ് 17നാണ് വീട്ടമ്മയുടെ ഫോണിലേക്ക് വിളിവന്നത്.
ബാങ്ക് ജീവനക്കാരനാണെന്നായിരുന്നു വ്യക്തി പരിചയപ്പെടുത്തിയത്. അതുകൊണ്ടുതന്നെ വീട്ടമ്മ ഒ.ടി.പി നമ്പര്‍ നല്‍കുകയായിരുന്നു. 7.20 ലക്ഷം രൂപയായിരുന്നു ഇവര്‍ക്ക് മുംബൈയിലെ ബാങ്കില്‍ സമ്പാദ്യമായുണ്ടായിരുന്നത്. വിവിധ നമ്പറുകളില്‍ നിന്ന് ഒരാഴ്ചക്കിടെ 28 തവണയാണ് ഒ.ടി.പി നമ്പര്‍ ചോദിച്ച് വിളി വന്നത്. പിന്നീടാണ് അക്കൗണ്ടില്‍ നിന്ന് പണം നഷ്ടപ്പെട്ടത് അവര്‍ അറിയുന്നത്. തുടര്‍ന്ന് വീട്ടമ്മ പൊലിസില്‍ പരാതി നല്‍കുകയായിരുന്നു. പൊലിസ് കേസെടുത്ത് അന്വേഷണം നടത്തി വരികയാണ്.