കല്‍പ്പറ്റ: കേള്‍വിയുടെ ലോകത്ത് പിച്ചവച്ചെത്തിയ അവര്‍ ഒന്നിക്കുകയാണ്. അവരുടെ സ്വപ്നങ്ങള്‍ പങ്കുവക്കാന്‍. ജില്ലയില്‍ കോക്ലിയര്‍ ഇംപ്ലാന്റ് എന്ന സര്‍ജറിയിലൂടെ കേള്‍വി ശക്തി കിട്ടിയ കുഞ്ഞുങ്ങളും അവരുടെ രക്ഷിതാക്കളും ഒത്തുചേരുന്നു.
നാളെ രാവിലെ 11 മണി മുതല്‍ മൂന്നുമണി വരെ കല്‍പ്പറ്റ പഴയ സ്റ്റാന്‍ഡിന് പുറകിലുള്ള എച്ച്.ഐ.എം.യു.പി സ്‌കൂളിലാണ് കോക്ലിയര്‍ ഇംപ്ലാന്റീസ് ഫാമിലി കൂട്ടായ്മയുടെ പ്രഥമ ജില്ലാതല സംഗമം സംഘടിപ്പിക്കുന്നത്.
ആധുനിക കണ്ടുപിടുത്തങ്ങളില്‍ ഏറ്റവും മികവുറ്റതായ ഈ സര്‍ജറിയിലൂടെയും തുടര്‍ന്നുള്ള നിരന്തര പരിശീലനത്തിലൂടെയും കേള്‍വിയുടെ ലോകത്തേക്കെത്തിയവരാണ് ഈ കുഞ്ഞുങ്ങള്‍. സര്‍ജറിയിലൂടെ കേള്‍വി ശക്തി നേടിയെടുത്ത കുഞ്ഞുങ്ങള്‍ക്കും അവരുടെ രക്ഷിതാക്കള്‍ക്കും ഒത്തുചേരാനും അനുഭവങ്ങള്‍ പങ്കുവയ്ക്കാനും മുന്നോട്ടുള്ള ജീവിതയാത്രയിലെ ആശയങ്ങളും മാര്‍ഗങ്ങളും പങ്കുവക്കുവാനുമാണ് പരിപാടി സംഘടിപ്പിക്കുന്നത്. മറ്റു ജില്ലകളിലെ കൂട്ടായ്മയുടെ കോഡിനേറ്റര്‍മാരും പരിപാടിയില്‍ പങ്കെടുക്കും.