കച്ച്: ഇന്ത്യന്‍ എയര്‍ഫോഴ്‌സിന്റെ ജാഗ്വര്‍ പോര്‍ വിമാനം തകര്‍ന്നുവീണ് പൈലറ്റ് മരിച്ചു.ജാംനഗര്‍ വ്യോമതാവളത്തിന് സമീപം ഇന്നലെ രാവിലെയാണ് ദുരന്തമുണ്ടായത്. എയര്‍ കമാന്‍ഡര്‍ സഞ്ജയ് ചൗഹാനാണ് മരിച്ചത്.
വ്യോമകേന്ദ്രത്തില്‍ നിന്ന് വിമാനം പറന്നുയര്‍ന്ന് അല്‍പസമയത്തിനകം കാലികള്‍ മേഞ്ഞു നടക്കുന്ന പാടത്തേക്ക് തകര്‍ന്നു വീഴുകയായിരുന്നു.
പതിവു പറക്കലിനിടെയാണ് അപകടമുണ്ടായത്. വിമാനം തകര്‍ന്നുവീഴാനുണ്ടായ കാരണം കണ്ടെത്തുന്നതിനായി എയര്‍ഫോഴ്‌സ് അന്വേഷണം പ്രഖ്യാപിച്ചു. മുന്ദ്രയ്ക്കടുത്ത ബരേജ ഗ്രാമത്തില്‍ വിമാനം തകര്‍ന്നതിന്റെ അവശിഷ്ടങ്ങള്‍ കണ്ടെത്തിയെന്ന് പൊലിസ് പറഞ്ഞു.ഏപ്രിലില്‍ എം 17 വിമാനം ഉത്തരാഖണ്ഡിലെ കേദാര്‍നാഥില്‍ തകര്‍ന്ന് വീണിരുന്നു. അപകടത്തില്‍ വിമാനത്തിലുണ്ടായിരുന്ന ആറ് പേരും പരുക്കേല്‍ക്കാതെ രക്ഷപ്പെട്ടു. മാര്‍ച്ചില്‍ ഒഡിഷയിലും എയര്‍ഫോഴ്‌സിന്റെ വിമാനം തകര്‍ന്നുവീണിരുന്നു.