ജിദ്ദ: കുടുംബത്തെ സഊദിയിലേക്ക് കൊണ്ട് വന്ന് കുറച്ചു ദിവസം കൂടെ നിർത്താനുള്ള ആഗ്രഹം ബാക്കിയാക്കി ചന്ദൻ യാത്രയായി. ജിസാന്‍ ബെയ്ഷില്‍ വെച്ച് മരണമടഞ്ഞ മണ്ണാര്‍ക്കാട് ചാത്തന്‍ കുന്നില്‍ ചന്ദ്രന്‍ എന്ന ബാബുവിന്റെ (46 ) മൃതദേഹം ജിസാനിലെ അബു ആരീഷ് ശ്മശാനത്തില്‍ അന്തിയുറക്കം. കോവിഡ് പശ്ചാത്തലത്തില്‍ നാട്ടിലേക്കു വിമാനങ്ങളില്ലാത്തതിനാല്‍ കഴിഞ്ഞ ആഴ്ച ജിസാനിലെ ബെയ്ഷില്‍ മരിച്ച മണ്ണാര്‍ക്കാട് ചെമ്മങ്ങാട്ടീര്‍ കുന്നില്‍ ചന്ദ്രന്‍ എന്ന ബാബുവിന് ഉപജീവനാര്‍ഥം കാല്‍ നൂറ്റാണുകാലം ജീവിച്ച മണ്ണില്‍ സംസ്കരിച്ചത്. ഇന്ത്യന്‍ കോണ്‍സുലേറ്റ് സോഷ്യല്‍ വെല്‍ഫെയര്‍ അംഗവും ജിസാന്‍ കെഎംസിസി സെന്‍ട്രല്‍ കമ്മിറ്റി പ്രസിഡന്റുമായ ഹാരിസ് കല്ലായിയുടെ നേതൃത്വത്തില്‍ സുഹൃത്തുക്കളും സ്‌പോണ്‍സറുമെല്ലാം ചേര്‍ന്ന് ഹിന്ദു ആചാരപ്രകാരമാണ് മൃതദേഹം സംസ്‌കരിച്ചത്. ഇപ്പോഴത്തെ സാഹചര്യത്തില്‍ മൃതദേഹം നാട്ടിലെത്തിക്കുക എളുപ്പമല്ലെന്ന് മനസിലാക്കിയ കുടുംബം ചന്ദ്രന്റെ മൃതദേഹം ജിസാനില്‍തന്നെ അടക്കുന്നതിന് അനുമതി നല്‍കുകയായിരുന്നു.

സമ്മതപത്രം ജിസാന്‍ കെഎംസിസി ഉപാധ്യക്ഷന്‍ ഷമീര്‍ അമ്പലപ്പാറക്കാണ് കുടുംബം നല്‍കിയത്. ബെയ്ഷ് ജനറല്‍ ആശുപത്രി മോര്‍ച്ചറിയില്‍ സൂക്ഷിച്ചിരുന്ന മൃതദേഹം ഹാരിസ് കല്ലായിയുടെ നേതൃത്വത്തില്‍ ഏറ്റുവാങ്ങിയ ശേഷം അബു ആരീഷ് ശ്മശാനത്തില്‍ നടന്ന ചടങ്ങുകള്‍ക്ക് ബെയ്ഷ് ഒഐസിസി ജനറല്‍ സെക്രട്ടറി ദിലീപ് കളരിക്കമണ്ണേല്‍ മേല്‍നോട്ടം വഹിച്ചു. കോവിഡ് ജാഗ്രതാ നിര്‍ദേശ പ്രകാരമുള്ള നിയന്ത്രണങ്ങള്‍ പാലിച്ചുകൊണ്ടു നടന്ന ചടങ്ങില്‍ സുഹൃത്തുക്കളും സ്‌പോണ്‍സറും മുനിസിപ്പല്‍ അധികൃതരും പങ്കെടുത്തു.  

ഇരുപത്തി അഞ്ചു വർഷമായി സഊദിയിലുള്ള ചന്ദ്രൻ കുടുംബത്തെ കൊണ്ട് വരാനായി ഫാമിലി വിസ നടപടി ക്രമങ്ങൾ പൂർത്തിയാക്കി കാത്തിരിക്കുകയായിരുന്നു. കുടുംബത്തെ താമസിപ്പിക്കാനായി ഫാമിലി ഫ്‌ളാറ്റും എടുത്തു വെച്ചിരുന്നു. അതിനിടയിലാണ് ക്ഷണിക്കാത്ത അതിഥിയായി മരണം കടന്നു വരുന്നത്.

ബൈഷില്‍ വര്‍ക്ക്‌ഷോപ്പ് നടത്തി വരികയായിരുന്നു ചന്ദ്രൻ.മണ്ണാര്‍ക്കാട് ചാത്തന്‍ കുന്നില്‍ ഗോപാലന്റെയും ദേവകിയുടെയും മകനാണ് ചന്ദ്രൻ. ഊര്‍മ്മിളയാണ് ചന്ദ്രന്റെ ഭാര്യ. ജ്യോത്സന, ജ്യോതിഷ്എന്നിവർ മക്കളാണ്.