പേരാവൂര്‍: പത്തുകുപ്പി വിദേശമദ്യവുമായി പെരുമ്പുന്ന സ്വദേശി പേരാവൂര്‍ എക്‌സൈസിന്റെ പിടിയിലായി.
പെരുമ്പുന്ന കൊട്ടയാട് കുന്നത്ത് വീട്ടില്‍ ചാക്കോ മകന്‍ കെ.സി കുര്യാക്കോസ് ആണ് പിടിയിലായത്.
കേളകം ബീവറേജസ് ചില്ലറവില്‍പനശാലയില്‍ നിന്ന് അനുവദനീയമായ അളവില്‍ കൂടുതല്‍ (അഞ്ച് ലിറ്റര്‍) ഇന്ത്യന്‍ നിര്‍മിത വിദേശമദ്യം വാങ്ങി കടത്തിക്കൊണ്ടു വരുന്നതിനിടെയാണ് ഇയാള്‍ എക്‌സൈസ് സംഘത്തിന്റെ പിടിയിലാവുന്നത്.
എക്‌സൈസ് പ്രിവന്റീവ് ഓഫിസര്‍ എം.പി സജീവന്റെ നേതൃത്വത്തില്‍ പ്രിവന്റീവ് ഓഫിസര്‍ പി.സി ഷാജി, സിവില്‍ എക്‌സൈസ് ഓഫിസര്‍മാരായ പി. ശ്രീനാഥ്, സതീഷ് വിളങ്ങോട്ടുഞാലില്‍, പി.എസ് ശിവദാസന്‍, കെ. ശ്രീജിത്ത് എന്നിവരുള്‍പ്പെട്ട സംഘമാണ് ഇയാളെ പിടികൂടിയത്.