കൊച്ചി: വിഴിഞ്ഞം തുറമുഖ നിര്‍മാണ കരാര്‍ നടപടികളില്‍ വ്യക്തികളെ കുറ്റക്കാരായി കാണാന്‍ കഴിയില്ലെന്ന് അന്വേഷണ കമ്മിഷന്‍ അധ്യക്ഷന്‍ ജസ്റ്റിസ് സി.എന്‍ രാമചന്ദ്രന്‍. കരാര്‍ നടപടികള്‍ കേന്ദ്ര നിര്‍ദേശങ്ങളുടെയും സര്‍ക്കാരിന്റെ കൂട്ടായ തീരുമാനത്തിന്റെയും അടിസ്ഥാനത്തിലായിരുന്നതിനാലാണിതെന്ന് കമ്മിഷന്‍ വ്യക്തമാക്കി.
മുന്‍ മുഖ്യമന്ത്രി ഉമ്മന്‍ചാണ്ടിയുടെ വാദം കേള്‍ക്കുന്നതിനിടെയായിരുന്നു കമ്മിഷന്റെ നിരീക്ഷണം.പല തവണ നടക്കാതെപോയ പദ്ധതിയുമായി ഉമ്മന്‍ചാണ്ടി സര്‍ക്കാര്‍ മുന്നോട്ടുപോകുകയായിരുന്നുവെന്ന് അദ്ദേഹത്തിനു വേണ്ടി ഹാജരായ അഭിഭാഷകന്‍ വാദിച്ചു.
ഏതെങ്കിലും കമ്പനിക്ക് അനുകൂലമായ രീതിയില്‍ വ്യവസ്ഥകള്‍ മാറ്റിയിട്ടില്ല. അതേസമയം വിഴിഞ്ഞം തുറമുഖം സാമ്പത്തികമായി നിലനില്‍ക്കുന്നതല്ലെന്ന് 2010ല്‍ സര്‍ക്കാര്‍ നിയോഗിച്ച വിദഗ്ധ സമിതി റിപ്പോര്‍ട്ട് നല്‍കിയിട്ടും തുടര്‍ന്നുവന്ന സര്‍ക്കാര്‍ പദ്ധതിയുമായി മുന്നോട്ടുപോവുകയായിരുന്നുവെന്നും ഉമ്മന്‍ചാണ്ടിയുടെ അഭിഭാഷകന്‍ പറഞ്ഞു. പദ്ധതിയുമായി മുന്നോട്ടുപോവുകയും അന്വേഷണ കമ്മിഷനെ നിയോഗിക്കുകയും ചെയ്തത് സര്‍ക്കാരിന്റെ ഇരട്ടത്താപ്പാണെന്നും അഭിഭാഷകന്‍ വാദിച്ചു. കമ്പനികളെ തിരഞ്ഞെടുക്കുന്നതിന് വ്യവസ്ഥകളില്‍ മാറ്റം വരുത്തിയിട്ടില്ലെന്ന് അദാനി ഗ്രൂപ്പും കമ്മിഷന്‍ മുന്‍പാകെ അറിയിച്ചു. കമ്മിഷന്‍ സിറ്റിങ് ഇന്നും തുടരും.