തിരുവനന്തപുരം: കുമ്മനം രാജശേഖരന്‍ ഗവര്‍ണറായ ശേഷം മൂന്നു ദിവസത്തിനുള്ളില്‍ സംസ്ഥാനത്ത് പുതിയ ബി.ജെ.പി അധ്യക്ഷനെ നിയമിക്കുമെന്ന് കേന്ദ്ര നേതൃത്വം പറഞ്ഞിരുന്നെങ്കിലും അനിശ്ചിതത്വം തുടരുന്നു. സംസ്ഥാനത്തെ ബി.ജെ.പിക്കുള്ളിലെ ഗ്രൂപ്പ് പോര് കാരണം പ്രസിഡന്റിനെ തീരുമാനിക്കാന്‍ കഴിയാത്ത അവസ്ഥയിലാണ് ബി.ജെ.പി നേതൃത്വം. സംസ്ഥാനത്തെ പ്രമുഖ നേതാക്കളില്‍ പലരുടെയും പേരുകള്‍ പരിഗണിക്കപ്പെട്ടെങ്കിലും ഗ്രൂപ്പിസമെന്ന കാരണത്താല്‍ അവയെല്ലാം മാറ്റിവയ്ക്കുകയായിരുന്നു.
അധ്യക്ഷ സ്ഥാനത്തേക്ക് ആര്‍.എസ്.എസ് സഹപ്രാന്ത കാര്യവാഹകും ജന്മഭൂമി പത്രത്തിന്റെ മാനേജിങ് ഡയറക്ടറുമായ എം. രാധാകൃഷ്ണന്റെ പേരാണ് ബി.ജെ.പി കേന്ദ്ര നേതൃത്വത്തിന്റെ സജീവമായ പരിഗണനയില്‍ ഇപ്പോഴുള്ളത്. സംസ്ഥാന ജന. സെക്രട്ടറിമാരായ കെ. സുരേന്ദ്രന്‍, എം.ടി രമേശ് എന്നിവരുടെയും മുന്‍ അധ്യക്ഷന്‍ കൂടിയായ പി.കെ കൃഷ്ണദാസിന്റെയും പേരുകള്‍ സംസ്ഥാന അധ്യക്ഷ പദവിയിലേക്കു പരിഗണിക്കപ്പെട്ടെങ്കിലും ഒന്നിലും തീരുമാനമായിട്ടില്ല.