കോഴിക്കോട്: പുണ്യമാസത്തിന്റെ നിര്‍വൃതിയിലാണ് ബാലുശ്ശേരി എകരൂര്‍ ആരപ്പറ്റ സജീവ്. ഇന്നലെ വരെയുള്ള എല്ലാ നോമ്പും നോറ്റു. വിശുദ്ധ റമദാന്‍ മാസം ആരംഭിച്ചത് മുതല്‍ സജീവ് മുറതെറ്റിക്കാതെയാണ് വ്രതമനുഷ്ഠിക്കുന്നത്. ആദ്യമായിട്ടാണ് നോമ്പ് നോല്‍ക്കുന്നതെങ്കിലും സജീവന് ഒരു പ്രായസവുമില്ല. ഭാര്യ രജിലയുടെയും കൂട്ടുകാരുടെയും അകമൊഴിഞ്ഞ പിന്തുണയും സജീവനുണ്ട്. ഇദ്ദേഹത്തിന്റെ ശീലം പിന്തുടര്‍ന്ന് ആറാം ക്ലാസില്‍ പഠിക്കുന്ന മകന്‍ ജനൂസ് ജീവനും നോമ്പെടുക്കുന്നുണ്ട്.
എല്ലാ ദിവസവും പുലര്‍ച്ചെ മൂന്നിന് എഴുന്നേറ്റ് ഭക്ഷണം കഴിച്ചാണ് സജീവ് നോമ്പെടുക്കാനായി തയാറെടുക്കുന്നത്. ആദ്യ ദിവസങ്ങളില്‍ ഊണായിരുന്നു കഴിച്ചിരുന്നതെങ്കില്‍ പിന്നീട് കഞ്ഞി മാത്രമാണ് കഴിക്കാറുള്ളതെന്ന് സജീവ് പറയുന്നു. കുടുംബത്തിലെ എല്ലാ അംഗങ്ങളെയും വിളിച്ചുവരുത്തി നോമ്പുതുറ നടത്താറുണ്ടെന്നും എല്ലാവരുടെയും സന്തോഷമാണ് എനിക്കെല്ലാമെന്നും സജീവ് പറഞ്ഞു. ചെറുപ്രായത്തില്‍ കൂടത്തായി അമ്പലമുക്ക് ഭാഗത്തുള്ളവര്‍ നോമ്പ് തുറക്കുമ്പോള്‍ 30 ദിവസവും വിഭവങ്ങള്‍ തങ്ങളുടെ തറവാട്ടില്‍ എത്തിക്കാറുണ്ടെന്നും സജീവ് ഓര്‍ത്തെടുക്കുന്നു. ആ ഓര്‍മകളും തനിക്ക് മുതല്‍ക്കൂട്ടായുണ്ട്.
മഹത്തായ വ്രതത്തിലുടെ ലഭിക്കുന്ന ജീവിത സന്ദേശവും ഇസ്‌ലാമിക കാഴ്ചപ്പാടുകളോടുള്ള താല്‍പര്യവുമാണ് ഇതിനു പ്രചോദനമായത്. മനസും ശരീരവും സ്വയം നിയന്ത്രിക്കാനും നന്നാക്കാനും വിശക്കുന്നവന്റെ വേദനകള്‍ മനസിലാക്കാനും വ്രതത്തിലൂടെ കഴിയും. വ്രതം കാരണം കാലിലെ നീര്‍ക്കെട്ട് ഉള്‍പ്പെടെയുള്ള രോഗം വരെ മാറിയെന്നും സജീവ് പറയുന്നു. ഫാബ്രിക്കേഷന്‍ ജോലി കഴിഞ്ഞ് വൈകിട്ട് വീട്ടിലെത്തിയ ശേഷം ബാങ്ക് വിളിക്കുന്നതോടെ നാരങ്ങാ വെള്ളവും തരിക്കഞ്ഞിയും കുടിച്ച് നോമ്പ് തുറക്കുതാണ് സജീവന്റെ ശൈലി. അടുത്ത തവണ ഭാര്യ രജിലയും മക്കളും ഉള്‍പ്പെടെ വ്രതത്തിനായി തയാറെടുക്കുമെന്നും സജീവ് പറഞ്ഞു. ജിത്തു ജീവന്‍, ജിശാന്ത് ജീവന്‍ എന്നിവരാണ് മറ്റു മക്കള്‍.