വടകര: കാഫിര്‍ സ്‌ക്രീന്‍ഷോട്ട് കേസിലെ അന്വേഷണ പുരോഗതി റിപ്പോര്‍ട്ട് ഇന്ന് തന്നെ ഹാജരാക്കണമെന്ന് കോടതി. വടകര ഫസ്റ്റ്ക്ലാസ് ജുഡീഷ്യല്‍ മജിസ്ട്രേറ്റ്  കോടതിയാണ് പൊലിസിന് നിര്‍ദ്ദേശം നല്‍കിയത്. പൊലിസ് കൂടുതല്‍ സമയം ചോദിച്ചെങ്കിലും ഇന്ന് തന്നെ വിവരങ്ങള്‍ ഹാജരാക്കണമെന്നാണ് നിര്‍ദ്ദേശം. 

അന്വേഷണ പുരോഗതിയുടെ റിപ്പോര്‍ട്ടും പിടിച്ചെടുത്ത ഫോണുകളുടെ ഫോറന്‍സിക് പരിശോധനാ ഫലവും ഹാജരാക്കാന്‍ രണ്ടാഴ്ച മുന്നേ പൊലിസിന് കോടതി നിര്‍ദേശം നല്‍കിയിരുന്നു. എന്നാല്‍ പൊലിസ് അത് ഹാജരാക്കിയിരുന്നില്ല. 

കേസെടുത്ത് എട്ട് മാസമായിട്ടും അന്വേഷണത്തിലെ കാലതാമസം ചൂണ്ടിക്കാട്ടിയും അന്വേഷണത്തില്‍ കോടതി മേല്‍നോട്ടം ആവശ്യപ്പെട്ടുമാണ് കേസില്‍ പ്രതിചേര്‍ക്കപ്പെട്ട എം.എസ്.എഫ് നോതാവ് മുഹമ്മദ് കാസിം കോടതിയെ സമീപിച്ചത്. 

ഫോറന്‍സിക് പരിശോധനയും അന്വേഷണവും വേഗത്തില്‍ പൂര്‍ത്തിയാക്കണമെന്ന് ഹൈക്കോടതി നേരത്തെ നിര്‍ദ്ദേശം നല്‍കിയിരുന്നു. അന്വേഷണ ഘട്ടത്തില്‍ പ്രത്യേകമായി ഇടപെടുന്നില്ലെന്ന് വ്യക്തമാക്കിയ ഹൈക്കോടതി, പരാതിക്കാരന്റെ ഹരജി തീര്‍പ്പാക്കുകയായിരുന്നു. എന്നാല്‍ അന്വേഷണത്തിന്റെ ഏതെങ്കിലും ഘട്ടത്തില്‍ അപാകത തോന്നുന്നുണ്ടെങ്കില്‍ പരാതിക്കാരന് ബന്ധപ്പെട്ട മജിസ്ട്രേറ്റിനെ സമീപിക്കാമെന്നും ഹൈക്കോടതി നിര്‍ദ്ദേശിച്ചിരുന്നു. ഇതിന്റെ അടിസ്ഥാനത്തിലാണ് പരാതിക്കാരന്‍ വടകര കോടതിയെ സമീപിച്ചത്.