ബ്രസ്സല്‍സ്: ലോകകപ്പിന് മുന്നോടിയായുള്ള സൗഹൃദ ഫുട്‌ബോള്‍ പോരാട്ടത്തില്‍ ബെല്‍ജിയത്തിന് തകര്‍പ്പന്‍ ജയം. സ്വന്തം നാട്ടില്‍ അരങ്ങേറിയ മത്സരത്തില്‍ അവര്‍ മറുപടിയില്ലാത്ത മൂന്ന് ഗോളുകള്‍ക്ക് ഈജിപ്തിനെ തകര്‍ത്തു.
മറ്റ് മത്സരങ്ങളില്‍ ലോകകപ്പിനെത്തുന്ന ദക്ഷിണ കൊറിയ- ബൊളീവിയയുമായി ഗോള്‍രഹിത സമനിലയില്‍ പിരിഞ്ഞു. ആഫ്രിക്കന്‍ കരുത്തുമായി ലോകകപ്പിനൊരുങ്ങുന്ന നൈജീരിയക്ക് ചെക്ക് റിപ്പബ്ലിക്കിന്റെ ഷോക് ട്രീറ്റ്‌മെന്റ്. മറുപടിയില്ലാത്ത ഒറ്റ ഗോളിന് അവര്‍ പരാജയം സമ്മതിച്ചു. സമാന തോല്‍വി പാനമയും നേരിട്ടു. നോര്‍വെ അവരെ 1-0ത്തിന് കീഴടക്കി.
സൂപ്പര്‍ താരം മുഹമ്മദ് സലാഹിന്റെ അഭാവം ഈജിപ്ത് നിരയില്‍ മുഴച്ചുകണ്ടു എന്നതാണ് മത്സരത്തിന്റെ ആകെ തുക. ബെല്‍ജിയത്തിനെതിരേ അതേ രീതിയില്‍ തന്നെ മികച്ച പന്തടക്കവും പാസിങും പുറത്തെടുക്കാന്‍ ഈജിപ്ഷ്യന്‍ നിരയ്ക്ക് കഴിഞ്ഞു. പക്ഷേ മികച്ച ആക്രമണം നടത്തി അത് ഫിനിഷ് ചെയ്യാന്‍ മുന്നേറ്റത്തിന് കഴിയാതെ പോയി. സ്വന്തം നാട്ടില്‍ അച്ചടക്കമുള്ള കളിയാണ് ബെല്‍ജിയം പുറത്തെടുത്തത്.
സൂപ്പര്‍ താരങ്ങളായ റൊമേലു ലുകാകു, ക്യാപ്റ്റന്‍ ഈദന്‍ ഹസാദ്, പ്രതിരോധ താരം മൗരാന്‍ ഫെല്ലയ്‌നി എന്നിവരാണ് ഗോളുകള്‍ നേടിയത്. ആദ്യ പകുതിയില്‍ രണ്ട് ഗോളടിച്ച ബെല്‍ജിയം സംഘം മൂന്നാം ഗോള്‍ അവസാന നിമിഷമാണ് സ്വന്തമാക്കിയത്.
27ാം മിനുട്ടില്‍ ലുകാകുവാണ് ഗോളടിക്ക് തുടക്കമിട്ടത്. 38ാം മിനുട്ടില്‍ ഹസാദ് രണ്ടാം ഗോളും നേടി. മത്സരം ഇഞ്ച്വറി ടൈമിലേക്ക് നീണ്ട ഘട്ടത്തിലാണ് ഫെല്ലയ്‌നിയുടെ വക മൂന്നാം ഗോള്‍ പിറന്നത്.