എടവണ്ണ: പഞ്ചായത്തിലെ വിവിധ പ്രദേശങ്ങളില്‍ സംശയകരമായ ഡെങ്കിപ്പനി കേസുകള്‍ റിപ്പോര്‍ട്ട് ചെയ്യപ്പെട്ട സാഹചര്യത്തില്‍ എടവണ്ണ ടൗണ്‍, കുന്നുമ്മല്‍, പത്തപ്പിരിയം പാണ്ടിയാട് എന്നിവിടങ്ങളില്‍ ഗ്രാമപഞ്ചായത്ത് സെക്രട്ടറി, സാമൂഹ്യാരോഗ്യ കേന്ദ്രം മെഡിക്കല്‍ ഓഫിസര്‍, എടവണ്ണ പൊലിസ് എന്നിവരുടെ നേതൃത്വത്തില്‍ പ്രത്യേക പരിശോധന നടത്തി.
കൊതുക് പെരുകുന്ന സാഹചര്യം സൃഷ്ടിക്കുന്ന തരത്തില്‍ ആക്രി വസ്തുക്കള്‍ പൊതുസ്ഥലത്തും വെള്ളം കെട്ടി നില്‍ക്കുന്ന രീതിയില്‍ തുറസായ സ്ഥലത്തും സൂക്ഷിച്ചതിന് കുന്നുമ്മലിലെ ആക്രികട ഉടമകളില്‍ നിന്നും പിഴ ഈടാക്കല്‍ ഉള്‍പ്പെടെയുള്ള നടപടികള്‍ സ്വീകരിക്കുകയും വെള്ളം കെട്ടി നില്‍ക്കാത്ത രീതിയില്‍ സംരക്ഷിക്കാന്‍ നിര്‍ദേശം നല്‍കുകയും ചെയ്തു.
വൃത്തിഹീനമായ സാഹചര്യങ്ങളില്‍ ഇതര സംസ്ഥാന തൊഴിലികളെ താമസിപ്പിച്ചതിനും മാലിന്യം കുന്നുകൂട്ടിയിട്ടതിനും പത്തപ്പിരിയത്തയും പാണ്ടിയാട്ടിലെയും കെട്ടിട ഉടമകള്‍ക്കെതിരേ നിയമ നടപടി സ്വീകരിക്കും.
എടവണ്ണ ടൗണിലെ മിക്ക കെട്ടിടങ്ങളുടെയും പിറകുവശത്ത് മാലിന്യ നിക്ഷേപം ശ്രദ്ധയില്‍പെട്ടതിനെ തുടര്‍ന്ന് കെട്ടിട ഉടമകള്‍ക്കെതിരെയും നടപടി സ്വീകരിക്കും.
കൊതുകു പെരുകുന്ന സാഹചര്യവും മാലിന്യ നിഷേപവും ഒരു തരത്തിലും അനുവദിക്കുകയില്ലന്നും വീഴ്ച വരുത്തുന്നവരുടെ പേരില്‍ കേരള പഞ്ചായത്ത് രാജ് ആക്ട് പ്രകാരമുള്ള ശക്തമായ നടപടികള്‍ സ്വീകരിക്കുമെന്നും വരും നാളുകളില്‍ പരിശോധന ശക്തമാക്കുമെന്നും പഞ്ചായത്ത് സെക്രട്ടറി അറിയിച്ചു.
പഞ്ചായത്ത് സെക്രട്ടറി ഐ. ഫാസില്‍ഷാ, അസി. സെക്രട്ടറി വിമലാദേവി, സീനിയര്‍ ക്ലാര്‍ക്ക് എം.എ സതീശന്‍, എടവണ്ണ സാമൂഹ്യാരോഗ്യ കേന്ദ്രം മെഡിക്കല്‍ ഓഫിസര്‍ ഡോ. സി. മൊയ്തീന്‍കോയ, ഹെല്‍ത്ത് സൂപ്പര്‍വൈസര്‍ ഒ.കെ തോമസ്, ഹെല്‍ത്ത് ഇന്‍സ്‌പെക്ടര്‍ പി. അബ്ദുറഹ്മാന്‍, ജെ.എച്ച്.ഐമാരായ പി. വേണുഗോപാല്‍, പി. അബ്ദുല്‍ നാസര്‍, സിവില്‍ പൊലിസ് ഓഫിസ് എം. ഫാസില്‍, സി.ടി ഷൗക്കത്തലി, സാലിഹ് പരിശോധനക്ക് നേതൃത്വം നല്‍കി.