സിംഗപ്പൂര്‍ സിറ്റി: യു.എസ് പ്രസിഡന്റ് ഡൊണാള്‍ഡ് ട്രംപും ഉത്തര കൊറിയന്‍ ഭരണാധികാരി കിം ജോങ് ഉന്നും തമ്മിലുള്ള കൂടിക്കാഴ്ചക്ക് ഏതാനും ദിവസങ്ങള്‍ ബാക്കിനില്‍ക്കെ സിംഗപ്പൂരില്‍ ദക്ഷിണ കൊറിയന്‍ മാധ്യമപ്രവര്‍ത്തകര്‍ അറസ്റ്റില്‍. രാജ്യത്തെ ഉ.കൊറിയന്‍ അംബാസഡറുടെ വസതിയില്‍ അതിക്രമിച്ചുകയറാന്‍ ശ്രമിച്ചെന്ന് ആരോപിച്ചാണ് രണ്ട് മാധ്യമപ്രവര്‍ത്തകര്‍ പിടിയിലായത്.
ദ.കൊറിയന്‍ ചാനലായ കെ.ബി.എസിന്റെ റിപ്പോര്‍ട്ടര്‍മാരെയാണ് പൊലിസ് അറസ്റ്റ് ചെയ്തത്. മറ്റു രണ്ട് ദ.കൊറിയന്‍ മാധ്യമപ്രവര്‍ത്തകര്‍ക്കെതിരേ അന്വേഷണം നടക്കുന്നതായും പൊലിസ് അറിയിച്ചു. അടുത്ത ചൊവ്വാഴ്ച സിംഗപ്പൂരിലെ ഹോട്ടലില്‍ നടക്കുന്ന ഉ.കൊറിയ-യു.എസ് ഉച്ചകോടി റിപ്പോര്‍ട്ട് ചെയ്യാന്‍ 3,000ത്തോളം മാധ്യമപ്രവര്‍ത്തകര്‍ എത്തുമെന്നാണ് അറിയുന്നത്.
അതിനിടെ, കിം ജോങ് ഉന്നിനോട് മുഖസാദൃശ്യമുള്ള ഒരാളെ സിംഗപ്പൂര്‍ പൊലിസ് ചോദ്യം ചെയ്തുവിട്ടു. ഹൊവാര്‍ഡ് എക്‌സ് എന്നു പേരുള്ള ഹോങ്കോങ് ആള്‍മാറാട്ടക്കാരനെയാണ് പൊലിസ് കസ്റ്റഡിയിലെടുത്ത് രണ്ടുമണിക്കൂര്‍ നേരം ചോദ്യം ചെയ്തത്.