ഉത്തരവ് പഞ്ചാബ്-ഹരിയാന ഹൈക്കോടതിയുടേത്
ന്യൂഡല്‍ഹി: ബലപ്രയോഗത്തിലൂടെ പങ്കാളിയുമായി ലൈംഗികബന്ധത്തിലേര്‍പ്പെടുന്നത് വിവാഹമോചനത്തിനുള്ള മതിയായ കാരണമാണെന്ന് പഞ്ചാബ്-ഹരിയാന ഹൈക്കോടതി.
പ്രകൃതിവിരുദ്ധ ലൈംഗികബന്ധം, പങ്കാളി ഇഷ്ടപ്പെടാത്ത ലൈംഗികരീതികള്‍, നിര്‍ബന്ധിപ്പിച്ചു കിടപ്പറ പങ്കിടല്‍ തുടങ്ങിയവ സ്ത്രീകള്‍ക്കു വിവാഹമോചനം ആവശ്യപ്പെടാവുന്ന മതിയായ കാരണമാണെന്ന് ജസ്റ്റിസുമാരായ എം.എസ് ബേദിയും ഹരിപാല്‍ വര്‍മയും വ്യക്തമാക്കി.
സമാന ആരോപണം ഉന്നയിച്ച് ബട്ടിന്‍ഡ സ്വദേശിനിയായ യുവതിയുടെ ഹരജി പരിഗണിച്ചാണ് ഹൈക്കോടതിയുടെ നടപടി. നേരത്തെ യുവതിയുടെ ആവശ്യം കീഴ്‌ക്കോടതി തള്ളിയതിനെത്തുടര്‍ന്നാണ് ഹരജിക്കാരി ഹൈക്കോടതിയെ സമീപിച്ചത്.
പ്രകൃതിവിരുദ്ധ ലൈംഗികതയ്ക്ക് യുവതിയെ നിര്‍ബന്ധിപ്പിച്ചതിന് മെഡിക്കല്‍ രേഖകളോ മറ്റുതെളിവോ ഇല്ലെന്നു ചൂണ്ടിക്കാട്ടിയായിരുന്നു വിവാഹമോചനത്തിനുള്ള യുവതിയുടെ ആവശ്യം കീഴ്‌ക്കോടതി തള്ളിയത്. യുവതിയുടെ ആവശ്യം തള്ളിയത് തെറ്റാണെന്ന് വ്യക്തമാക്കിയാണ് അവരുടെ വിവാഹമോചന അപേക്ഷ ഹൈക്കോടതിയുടെ ഡിവിഷന്‍ ബെഞ്ച് അംഗീകരിച്ചത്.