അസ്റ്റാന: ലോക ഒന്നാം നമ്പര്‍ താരവും നിലവിലെ ഒളിംപിക് ചാംപ്യനുമായ ഉസ്‌ബെകിസ്ഥാന്റെ ഹസന്‍ബോയ് ഡസ്മറ്റോവിനെ അട്ടിമറിച്ച് ഇന്ത്യന്‍ ബോക്‌സിങ് താരം നുതലായ് ലാല്‍ബിയക്കിമ. കസാഖിസ്ഥാനില്‍ നടക്കുന്ന പ്രസിഡന്റ്‌സ് കപ്പ് ബോക്‌സിങ് പോരാട്ടത്തിലാണ് ഇന്ത്യന്‍ താരത്തിന്റെ ചരിത്ര നേട്ടം. 22 കാരനും മിസോറമിലെ ഐസ്വാള്‍ സ്വദേശിയുമായ ലാല്‍ബിയക്കിമ 49 കിലോ വിഭാഗം ക്വാര്‍ട്ടര്‍ പോരാട്ടത്തിലാണ് ലോക ഒന്നാം നമ്പര്‍ താരത്തെ മലര്‍ത്തിയടിച്ചത്.
4-1നായിരുന്നു ഇന്ത്യന്‍ താരത്തിന്റെ വിജയം. ജയത്തോടെ സെമിയിലെത്തിയ ലാല്‍ബിയക്കിമ ഒരു മെഡലുറപ്പാക്കുകയും ചെയ്തു. ആദ്യമായാണ് ഒരു ഇന്ത്യന്‍ താരം നിലവിലെ ഒളിംപിക് ചാംപ്യനെ അട്ടിമറിക്കുന്നത്.