മാഡ്രിഡ്: കൊവിഡ്-19 പടരുന്ന സാഹചര്യത്തില്‍ മാര്‍ച്ച് 14 മുതല്‍ കടുത്ത നിയന്ത്രണത്തിലാണ് സ്‌പെയിന്‍. അന്നുമുതല്‍ രാജ്യത്തെല്ലാവരും അടച്ചിട്ട വീടുകള്‍ക്കുള്ളിലായി. ഇനിയും ലോക്ക്ഡൗണ്‍ നീക്കാനായിട്ടില്ലെങ്കിലും കുട്ടികളെ പുറംലോകത്തേക്ക് തുറന്നുവിടാന്‍ തീരുമാനിച്ചിരിക്കുകയാണ് സ്‌പെയിന്‍.

'അവര്‍ക്ക് കുറച്ച് ശുദ്ധവായു ലഭിക്കട്ടേ'- എന്നാണ് ഇതു പ്രഖ്യാപിച്ച് സ്പാനിഷ് പ്രധാനമന്ത്രി പെഡ്രോ സാന്‍ഷെസ് പ്രഖ്യാപിച്ചത്. ചെറിയ കുട്ടികളുള്ള ബാഴ്‌സലോണിയന്‍ മേയര്‍ അദ കോലോ കഴിഞ്ഞയാഴ്ച പ്രധാനമന്ത്രിയോട് ഈ ആവശ്യമുന്നയിച്ചിരുന്നു.

സ്‌പെയിനില്‍ ഇതുവരെ രണ്ടു ലക്ഷത്തോളം പേര്‍ക്ക് കൊവിഡ് ബാധിക്കുകയും 20,000 മരിക്കുകയും ചെയ്തു.

മഹാമാരിയുടെ ക്രൂരമായ കടന്നുകയറ്റത്തെയും ദുരന്തനിമിഷങ്ങളെയുമാണ് സ്‌പെയിന്‍ അതിജീവിച്ചതെന്ന് ഇക്കാര്യം പ്രഖ്യാപിച്ച് പെഡ്രോ പറഞ്ഞു. എന്നാല്‍ ലോക്ക്ഡൗണ്‍ പൂര്‍ണമായും ഒഴിവാക്കാനായിട്ടില്ല. മെയ് 9 വരെ നീട്ടാന്‍ വേണ്ടി പാര്‍ലമെന്റിനോട് ആവശ്യപ്പെടുമെന്ന് അദ്ദേഹം പറഞ്ഞു.

ഞായറാഴ്ച സ്‌പെയിനില്‍ 565 പേരാണ് കൊവിഡ് ബാധിച്ച് മരിച്ചത്. ദിവസവും ആയിരങ്ങള്‍ മരിച്ചുവീണ സ്‌പെയിനിനെ സംബന്ധിച്ച് ഇത് ആശ്വാസക്കണക്കാണ്.