റിയാദ്: ലോകമാസകലം വ്യാപകമായ കൊവിഡ്-19 വൈറസ് പ്രതിസന്ധി വര്‍ഷാവസാനം വരെ നീണ്ടേക്കാമെന്ന സൂചനയിൽ ചിലവ് ചുരുക്കാനുള്ള പദ്ധതികളുമായി സഊദി അറേബ്യ. വൈറസ് പ്രതിസന്ധി വരുമാന മേഖലയിൽ ഉണ്ടാക്കിയ പ്രതിസന്ധി മൂലം ഈ വര്‍ഷം പ്രഖ്യാപിച്ച  പല പദ്ധതികളും നിര്‍ത്തിവെക്കുമെന്നും സഊദി ധനമന്ത്രി മുഹമ്മദ് അല്‍ജദ്ആന്‍ പറഞ്ഞു. സ്വകാര്യമേഖല പ്രതിസന്ധിയിലായതും എണ്ണ വിലയില്‍ ഇടിവുണ്ടായതും കാരണം രാജ്യത്തിന്റെ വരുമാനത്തില്‍ കുറവുണ്ടാകുന്നതുമാണ്  ചിലവ് ചുരുക്കൽ നടപടികളിലേക്ക് രാജ്യത്തെ പ്രേരിപ്പിക്കുന്നത്. 

 

       പ്രതിസന്ധി തരണം ചെയ്യാൻ വിവിധ വകുപ്പുകൾക്ക് തുക നീക്കിവെച്ചുവെന്നും വേണമെങ്കിൽ 100 ബില്യന്‍ റിയാല്‍ അധിക വായ്പയെടുക്കുമെന്നും അദ്ദേഹം അറിയിച്ചു. അതോടെ രാജ്യത്തെ പൊതുകടം 220 ബില്യന്‍ റിയാലായി ഉയരുമെന്ന് അദ്ദേഹം വ്യക്തമാക്കി. സാമ്പത്തിക പ്രതിസന്ധി നേരിടാന്‍ ഏതൊക്കെ മേഖലകളില്‍ ചെലവു ചുരുക്കണമെന്നത് പിന്നീട് തീരുമാനിക്കുമെന്നും അദ്ദേഹം പറഞ്ഞു.