വാഷിങ്ടണ്‍: കൊവിഡ് ബാധിച്ച് ലോകത്താകെ മരിച്ചവരുടെ എണ്ണം 1.86 ലക്ഷം പിന്നിടുകയും രോഗം സ്ഥിരീകരിച്ചവര്‍ 26.72 ലക്ഷത്തിലേറെയാകുകയും ചെയ്തു. 7.3 ലക്ഷത്തോളം പേരാണ് രോഗവിമുക്തരായിട്ടുള്ളത്. ലോകാരോഗ്യ സംഘടന നല്‍കുന്ന ഔദ്യോഗിക കണക്കുപ്രകാരം 1,75,694 പേരാണ് കൊവിഡ് ബാധിച്ച് ലോകത്താകെ മരിച്ചിരിക്കുന്നത്. 25,44,792 പേര്‍ക്കു രോഗം സ്ഥിരീകരിച്ചതായും ഔദ്യോഗിക കണക്കില്‍ പറയുന്നു.
ഏറ്റവും കൂടുതല്‍ മരണവും കൂടുതല്‍ പേര്‍ക്കു രോഗവും സ്ഥിരീകരിച്ച അമേരിക്കയില്‍ മരണസംഖ്യ അന്‍പതിനായിരത്തിലേക്ക് അടുക്കുകയാണ്. 48,300 പേരാണ് അമേരിക്കയില്‍ മരിച്ചിരിക്കുന്നത്. എട്ടര ലക്ഷത്തില്‍ അധികം പേര്‍ക്കാണ് ഇവിടെ രോഗം സ്ഥിരീകരിച്ചിരിക്കുന്നത്.
മരണസംഖ്യയില്‍ അമേരിക്കയ്ക്കു പിറകില്‍ രണ്ടാം സ്ഥാനത്തുള്ള ഇറ്റലിയില്‍ 25,085 പേരാണ് മരിച്ചിരിക്കുന്നത്. രണ്ടാം സ്ഥാനത്തുള്ള രാജ്യത്തെ മരണസംഖ്യയുടെ ഇരട്ടിയോളം പേരാണ് അമേരിക്കയില്‍ മരിച്ചിരിക്കുന്നത്. ഇറ്റലിയില്‍ 1.9 ലക്ഷത്തോളം പേര്‍ക്ക് രോഗം സ്ഥിരീകരിച്ചു. സ്‌പെയിനില്‍ 22,157 പേരും ഫ്രാന്‍സില്‍ 21,340 പേരുമാണ് മരിച്ചിരിക്കുന്നത്. ഇവിടങ്ങളില്‍ യഥാക്രമം 2.13 ലക്ഷം, 1.6 ലക്ഷം എന്നിങ്ങനെ പേര്‍ക്കാണ് രോഗം സ്ഥിരീകരിച്ചിരിക്കുന്നത്. അമേരിക്ക, ഇറ്റലി, സ്‌പെയിന്‍, ഫ്രാന്‍സ് എന്നീ രാജ്യങ്ങളിലാണ് മരണസംഖ്യ ഇരുപതിനായിരം പിന്നിട്ടിരിക്കുന്നത്. ബ്രിട്ടനില്‍ 18,738 പേരാണ് മരിച്ചത്. ഇവിടെ 1.38 ലക്ഷം പേര്‍ക്കു രോഗം സ്ഥിരീകരിച്ചിട്ടുണ്ട്.ജര്‍മനിയില്‍ 5,354, തുര്‍ക്കിയില്‍ 2,376, ഇറാനില്‍ 5,481, ചൈനയില്‍ 4,632, റഷ്യയില്‍ 555, ബ്രസീലില്‍ 2,940, ബെല്‍ജിയത്തില്‍ 6,490, കാനഡയില്‍ 2,028, നെതര്‍ലാന്‍ഡ്‌സില്‍ 4,177, സ്വിറ്റ്‌സര്‍ലാന്‍ഡില്‍ 1,538, ഇസ്‌റാഈലില്‍ 191, സ്വീഡനില്‍ 2,021, പാകിസ്താനില്‍ 228 എന്നിങ്ങനെയാണ് മരണസംഖ്യ. മറ്റു രാജ്യങ്ങളിലും മരണസംഖ്യയും രോഗം സ്ഥിരീകരിച്ചവരുടെ എണ്ണവും വര്‍ധിക്കുകയാണ്. കൊവിഡ് നിയന്ത്രവിധേയമായെന്നവകാശപ്പെട്ട ചൈനയില്‍ ഇന്നലെ പത്തുപേര്‍ക്കുകൂടി രോഗം സ്ഥിരീകരിച്ചിട്ടുണ്ട്.