മലപ്പുറം: മലപ്പുറം ഉപതെരഞ്ഞെടുപ്പിലൂടെ കെ.എം. മാണിയുടെ യു.ഡി.എഫ് പ്രവേശനത്തിനുളള പകുതി വാതില്‍ തുറന്നെന്ന് കേരള കോണ്‍ഗ്രസ് (ജേക്കബ്) നേതാവ് അനൂപ് ജേക്കബ് എം.എല്‍.എ.
യു.ഡി.എഫിലെ ഒരുഘടകകക്ഷിക്കും മാണിയുടെ മുന്നണി പ്രവേശനത്തില്‍ എതിര്‍പ്പില്ല. മാണിയുടെ വരവിനെ തങ്ങള്‍ സ്വാഗതം ചെയ്യുകയാണ്. മലപ്പുറത്ത് വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. കുഞ്ഞാലിക്കുട്ടി നല്ല ഭൂരിപക്ഷത്തില്‍ തിളക്കമാര്‍ന്ന വിജയം നേടും. തെരഞ്ഞെടുപ്പ് സംസ്ഥാന സര്‍ക്കാരിന്റെ തെറ്റായ നയങ്ങള്‍ക്കുളള മറുപടിയാവും. ഭൂരിപക്ഷത്തിലെ ഓരോ വര്‍ധനവും ജനങ്ങള്‍ സര്‍ക്കാരിന് നല്‍കുന്ന തിരിച്ചടിയാവും. ബി.ജെ.പി ഉയര്‍ത്തുന്ന വെല്ലുവിളികളും തിരഞ്ഞെടുപ്പില്‍ പ്രതിഫലിക്കുമെന്നും അനുപ് ജേക്കബ് പറഞ്ഞു.