കോഴിക്കോട്: മൂന്നുമാസം പ്രായമുള്ള ശിമ മെഹ്‌സിനിന്റെ ആദ്യപെരുന്നാളിന് പുത്തനുടുപ്പിന്റെ മണമില്ല. മൈലാഞ്ചിയിട്ട് ആഹ്ലാദം പങ്കിടാന്‍ കൊതിച്ച മുഹമ്മദ് ആദില്‍, ആദില, അംന, മുഹമ്മദ് അദ്‌നാന്‍, മുഹമ്മദ് തമീം, മുഹമ്മദ് റഫീഖ് എന്നിവര്‍ക്കെല്ലാം ഇത്തവണ നോമ്പും പെരുന്നാളുമെല്ലാം വീടിനു പുറത്താണ്.
കടലാക്രമണത്തില്‍ വീടു നഷ്ടപ്പെട്ട് കോഴിക്കോട് എം.എം ഹൈസ്‌കൂളിലെ ക്ലാസ് മുറിയില്‍ കഴിയുന്ന പന്ത്രണ്ടോളം കുടുംബങ്ങള്‍ പെരുന്നാളിന്റെ പൊലിമയില്‍ കണ്ണീര്‍ ചിത്രമാവുകയാണ്. ക്ലാസ് മുറിയിലെ ആടിക്കളിക്കുന്ന തൊട്ടിലിനു താഴെ വട്ടമിട്ടിരിക്കുകയാണ് ഈ കൂട്ടികള്‍. വാങ്ങിവച്ച പുതുവസ്ത്രമണിയാന്‍ പോലും ഇവര്‍ക്കു അവസരമില്ല. അത്താഴവും നോമ്പുതുറയും എല്ലാ ക്ലാസ്മുറിയില്‍ തന്നെ. സന്നദ്ധസഹായം നല്‍കുന്നവരാണ് ഇവര്‍ക്ക് ഭക്ഷണം എത്തിക്കുന്നത്. ബന്ധുക്കളുടെ വീട്ടിലേക്കു പോലും പോകാന്‍ വഴിയില്ലാതെയാണ് പലരും ഇവിടെ കഴിയുന്നത്.
വീടുകള്‍ പൂര്‍ണമായും തകര്‍ന്നുപോയി. ഇനി അവിടേക്ക് പോകാനാകില്ല. ശക്തമായ തിരയാണ്. വീട്ടുപകരണങ്ങള്‍ പോലും മാറ്റാനിടമില്ല. ശക്തമായ മഴയില്‍ ഉറങ്ങാന്‍ കഴിയാത്ത അവസ്ഥയാണ്. ക്ലാസു മുറിയിലെ ബെഞ്ചുകള്‍ അടുപ്പിച്ചിട്ട് അന്തിയുറങ്ങാനേ കഴിയൂ. കുട്ടികള്‍ പലരും മൈലാഞ്ചിയണിയാനുള്ള ഒരുക്കത്തിലാണ്. ചിലര്‍ അണിഞ്ഞു തുടങ്ങി. വാങ്ങിവച്ച പുതുവസ്ത്രം എടുക്കാന്‍ തകര്‍ന്ന വീട്ടിലേക്ക് പോകാന്‍ കൊതിയുണ്ടെങ്കിലും മുതിര്‍ന്നവര്‍ സമ്മതിക്കുന്നില്ല.
സ്‌കൂളിലെ ദുരിതാശ്വാസ ക്യാംപില്‍ കഴിയുന്ന പലരും ഇവിടെ തന്നെ പഠിക്കുന്നവരാണ്. സൗത്ത് ബീച്ചില്‍ ആദ്യമായാണ് ഇത്തരം കടലാക്രമണമുണ്ടാവുന്നത്.
ചാപ്പയില്‍ ഭാഗത്ത് നാല്‍പതോളം വീടുകള്‍ ഭീഷണിയിലാണ്. അധികൃതര്‍ പലരും സ്ഥലത്തെത്തിയിട്ടും കാര്യമായ നടപടികളൊന്നുമുണ്ടായിട്ടില്ല. പുതിയാപ്പയില്‍ ഹാര്‍ബര്‍ ജോലികള്‍ തുടങ്ങിയതു കൊണ്ടാണ് ചാപ്പയില്‍ ഭാഗത്ത് ഇത്തരം കടലാക്രമണമുണ്ടായതെന്ന് നാട്ടുകാര്‍ പറയുന്നു.