ബംഗളൂരു: പ്രമുഖ മാധ്യമപ്രവര്‍ത്തക ഗൗരി ലങ്കേഷിനെ വെടിവച്ചു കൊന്ന കേസില്‍ 26 കാരന്‍ അറസ്റ്റിലായി. കഴിഞ്ഞവര്‍ഷം സെപ്തംബറില്‍ വീടിനു പുറത്തുവച്ചാണ് ഗൗരി ലങ്കേഷ് കൊല്ലപ്പെട്ടത്.

കേസില്‍ അറസ്റ്റിലായ പരശുരാം വാഗ്മോര്‍ എന്നയാളെ കോടതി 14 ദിവസത്തെ പൊലിസ് കസ്റ്റഡിയില്‍ വിട്ടു. കര്‍ണാടക വിജയപുര സ്വദേശിയാണിയാള്‍.

കഴിഞ്ഞ തിങ്കളാഴ്ച മഹാരാഷ്ട്രയിലാണ് ഇയാള്‍ പിടിയിലായത്. കേസ് അന്വേഷിക്കുന്ന പ്രത്യേക സംഘം ഇയാളെ വിശദമായി ചോദ്യംചെയ്യും.

സംഘ്പരിവാറുമായി പ്രതിക്ക് ബന്ധമുണ്ടെന്ന് പൊലിസ് പറഞ്ഞു. 2012 ല്‍ സിന്ദാഗിയില്‍ മുസ്‌ലിം- ഹിന്ദു കലാപമുണ്ടാക്കാന്‍ റെവന്യൂ ഓഫിസിനു മുന്നില്‍ പാകിസ്താന്‍ പതാക ഉയര്‍ത്തിയ ആളാണിയാള്‍.