മങ്കട: ഉപജില്ലാ പ്രവേശനോത്സവം തലമുറ സംഗമ വേദിയായി. സ്‌കൂള്‍ ചരിത്രത്തിലെ നൂറാമത് ബാച്ചിനെ തൊണ്ണൂറ് കഴിഞ്ഞ പൂര്‍വ വിദ്യാര്‍ഥികള്‍ ആനയിച്ചാണ് പ്രവേശനോത്സവം നടത്തിയത്. മങ്കട പള്ളിപ്പുറം ഗവ.യു.പി സ്‌കൂളിലാണ് നവാഗതരായ കുരുന്നുകളെ സ്വീകരിക്കാന്‍ മുതിര്‍ന്ന തലമുറ കൂട്ടമായി സംഗമിച്ച് മാതൃകയായത്. 90 പിന്നിട്ട എ.കെ അഹമ്മദ് കുട്ടി, കെ.എ ശ്രീധരന്‍, മറിയുമ്മ ടീച്ചര്‍ തുടങ്ങിയവരുടെ നേതൃത്വത്തില്‍ ഒന്നാം ക്ലാസിലേക്ക് കുട്ടികളെ കൈപ്പിടിച്ചാനയിച്ചു.
ടി.എ അഹമ്മദ് കബീര്‍ എം.എല്‍.എ ക്ലാസെടുത്തു.
സ്‌കൂളില്‍ സജ്ജീകരിക്കുന്ന ചരിത്ര മ്യൂസിയത്തിലേക്കുള്ള വസ്തു ശേഖര സമാഹരണവും എം.എല്‍.എ തുടക്കം കുറിച്ചു. മങ്കട ബ്ലോക്ക് പ്രസിഡന്റ് സഹീദ എലിക്കോട്ടില്‍ അധ്യക്ഷയായി.
സ്‌കൂളിനായി നിര്‍മിക്കുന്ന 65 ലക്ഷം രൂപയുടെ കെട്ടിട നിര്‍മാണത്തിന്റെ ശിലാസ്ഥാപന കര്‍മവും എം.എല്‍.എ നിര്‍വഹിച്ചു. കൂട്ടിലങ്ങാടി പഞ്ചായത്ത് പ്രസിഡന്റ് സുഹ്‌റാബി യൂനിഫോം വിതരണോദ്ഘാടനം നിര്‍വഹിച്ചു.
ബ്ലോക്ക് വൈസ് പ്രസിഡന്റ് എന്‍.കെ അസ്‌കര്‍, ബ്ലോക്കംഗം ഷാലി സേവ്യര്‍,പഞ്ചായത്തംഗങ്ങളായ ഗീത, മുഹമ്മദ് സാലിം, കെ.പി സൈഫുദ്ദീന്‍, മോഹനന്‍ പുളിക്കല്‍, എ.ഇ.ഒ, ബി.പി.ഒ ഹരിദാസന്‍, കെ.പി ഹബീബ് റഹ്മാന്‍, എച്ച്.എം സുനില്‍ കുമാര്‍ തുടങ്ങിയവര്‍ സംസാരിച്ചു.