ന്യൂഡല്‍ഹി: കേരളം ഏറെ കാത്തിരിക്കുന്ന പാലക്കാട് റെയില്‍ കോച്ച് ഫാക്ടറി ഉപേക്ഷിച്ചുവെന്ന് കേന്ദ്രം. നിലവില്‍ പുതിയൊരു കോച്ച് ഫാക്ടറിയുടെ ആവശ്യകത റെയില്‍വേയ്ക്കില്ല. മെയിന്‍ ലൈന്‍ കോച്ചുകളുടെ നിര്‍മാണത്തിന് നിലവിലുള്ള സംവിധാനങ്ങള്‍ പര്യാപ്തമാണെന്നും റെയില്‍വേ അറിയിച്ചു.
റെയില്‍വേ മന്ത്രി പിയൂഷ് ഗോയലും സഹമന്ത്രി രാജന്‍ ഗോഹൈനും പാലക്കാട് എം.പി എം.ബി രാജേഷിനെ രേഖാമൂലം അറിയിച്ചതാണ് ഇക്കാര്യം.
2008 ഫെബ്രുവരി 25ന് അന്നത്തെ റെയില്‍വേ മന്ത്രി ലാലുപ്രസാദ് യാദവ് ആണ് പാലക്കാട് കഞ്ചിക്കോട്ട് കോച്ച് ഫാക്ടറി പ്രഖ്യാപിച്ചത്.
യു.പി.എ സര്‍ക്കാരില്‍ ദിനേഷ് ത്രിവേദി റെയില്‍വേ മന്ത്രിയായിരിക്കെ 2012 ഫെബ്രുവരി 21ന് ശിലാസ്ഥാപനവും നടന്നു. പിന്നീട് ആറുവര്‍ഷമായിട്ടും യാതൊരു അനുകൂല നടപടികളും ഇല്ലാതിരിക്കെയാണ് പാലക്കാട് കോച്ച് ഫാക്ടറിയുടെ ആവശ്യമില്ലെന്ന് ഇപ്പോള്‍ കേന്ദ്രസര്‍ക്കാര്‍ പ്രഖ്യാപിച്ചിരിക്കുന്നത്.
കഞ്ചിക്കോട് മേഖലയില്‍ സംസ്ഥാന സര്‍ക്കാര്‍ റയില്‍വേക്ക് കൈമാറിയ 230.10 ഏക്കര്‍ സ്ഥലം കാടുകയറി കിടക്കുകയാണ്. പദ്ധതി നടപ്പാക്കാന്‍ സ്വകാര്യപങ്കാളിയെ കിട്ടിയില്ലെന്നായിരുന്നു റെയില്‍വേയുടെ വാദം.