കൊച്ചി: ദോഹയിലേക്ക് മയക്കുമരുന്നു കടത്താന്‍ യുവാക്കളെ ഉപയോഗിച്ചെന്ന കേസില്‍ പ്രത്യേക അന്വേഷണ സംഘത്തെ നിയോഗിച്ചെന്ന് സര്‍ക്കാര്‍ ഹൈക്കോടതിയില്‍ അറിയിച്ചു. കോഴിക്കോട് ജില്ലാ പൊലിസ് മേധാവി എസ്. കാളിരാജ് മഹേഷ് കുമാറിന്റെ നേതൃത്വത്തിലുള്ള സംഘത്തെയാണ് അന്വേഷണം നടത്താന്‍ നിയോഗിച്ചിട്ടുള്ളതെന്ന് സര്‍ക്കാര്‍ അറിയിച്ചു. ഐ.ജി പി. വിജയന്‍ അന്വേഷണത്തിന് നേരിട്ട് മേല്‍നോട്ടം വഹിക്കും.
വിദേശത്തേക്ക് ജോലി തേടിപ്പോയ മക്കളെ വിസ ശരിയാക്കി നല്‍കിയവര്‍ മയക്കു മരുന്ന് കടത്താന്‍ ഉപയോഗിച്ചതാണെന്നും ഇവരെ കെണിയില്‍പ്പെടുത്തിയവര്‍ക്കെതിരേ പരാതി നല്‍കിയിട്ടും പൊലിസ് നടപടി എടുത്തില്ലെന്നും ഹരജിക്കാര്‍ ആരോപിച്ചിരുന്നു. എറണാകുളം മൂക്കന്നൂര്‍ സ്വദേശിനി കെ.വി ഉഷാകുമാരി, കോട്ടയം സ്വദേശിനി റോസമ്മ മാത്യു, ചെങ്ങന്നൂര്‍ സ്വദേശിനി കെ.ആര്‍ ഇന്ദിരാ ദേവി, എറണാകുളം ചേലാമറ്റം സ്വദേശിനി രമ ശശി എന്നിവരാണ് ഹരജിക്കാര്‍. ദോഹയിലെ ദുഹൈല്‍ ജയിലില്‍ കഴിയുന്ന ആഷിക് ആഷ്‌ലി (22), കെവില്‍ മാത്യു (26), ആദിത്യ മോഹനന്‍ (21), ശരത് ശശി (24) എന്നിവരെ രക്ഷിക്കണമെന്നാവശ്യപ്പെട്ട് അമ്മമാര്‍ ഹരജി നല്‍കിയത്.