ന്യൂഡല്‍ഹി: ബാബരി മസ്ജിദ് കേസില്‍ വിചാരണ നേരിടാന്‍ തയ്യാറാണെന്ന് മുതിര്‍ന്ന ബി.ജെ.പി നേതാക്കളായ എല്‍.കെ അദ്വാനിയും മുരളീ മനോഹര്‍ ജോഷിയും സുപ്രിം കോടതിയെ അറിയിച്ചു. വിചാരണ നേരിടേണ്ടി വരുമെന്ന് കേസ് പരിഗണിച്ച സുപ്രിം കോടതി നിരീക്ഷിച്ചതിനു പിന്നാലെയാണ് ഇരുവരും അനുകൂല നിലപാടറിയിച്ചത്.

കേസില്‍ വിചാരണ ആരംഭിക്കണമെന്ന് സി.ബി.ഐ നേരത്തെ സുപ്രിംകോടതിയില്‍ ആവശ്യപ്പെട്ടിരുന്നു. ഇതോടെ കേസില്‍ വിധി പറയുന്നത് മറ്റൊരു ദിവസത്തേക്ക് മാറ്റി.

എല്‍.കെ അദ്വാനി, മുരളി മനോഹര്‍ ജോഷി, ഉമാ ഭാരതി, വിനയ് കത്യാര്‍, കല്യാണ്‍ സിങ് തുടങ്ങിയ ബിജെപി നേതാക്കള്‍ക്കെതിരേയുള്ള ക്രിമിനല്‍ ഗൂഢാലോചന കുറ്റം ഒഴിവാക്കിയതിനെതിരെ സി.ബി.ഐയാണ് സുപ്രിംകോടതിയെ സമീപിച്ചത്. അദ്വാനി അടക്കമുള്ളവര്‍ വിചാരണ നേരിടണോയെന്ന കാര്യത്തില്‍ കഴിഞ്ഞമാസം തീരുമാനമെടുക്കുമെന്നായിരുന്നു ജസ്റ്റിസുമാരായ പി.സി ഘോഷ്, രോഹിന്‍ടണ്‍ നരിമാന്‍ എന്നിവരുടെ ബെഞ്ച് വ്യക്തമാക്കിയിരുന്നത്. സാങ്കേതിക കാരണങ്ങള്‍ പറഞ്ഞ് ക്രിമിനല്‍ ഗൂഢാലോചന കുറ്റത്തില്‍നിന്നു നേതാക്കളെ ഒഴിവാക്കിയ കീഴ്‌കോടതിയുടെ നടപടി അംഗീകരിക്കാനാകില്ലെന്നു ജസ്റ്റീസ് നരിമാന്‍ നിരീക്ഷിക്കുകയും ചെയ്തിരുന്നു.

കേസില്‍ രണ്ട് എഫ്.ഐ.ആറുകളാണ് രജിസ്റ്റര്‍ ചെയ്തിട്ടുള്ളത്. റായ്ബറേലി കോടതി 57 സാക്ഷികളെ വിസ്തരിക്കുകയും 100ലധികം തെളിവുകള്‍ പരിശോധിക്കുകയും ചെയ്തു. ലക്‌നൗ കോടതിയില്‍ 195 സാക്ഷികളെ വിസ്തരിക്കുകയും 300ലധികം തെളിവുകള്‍ പരിശോധിക്കുകയും ചെയ്തിട്ടുണ്ട്.