നിസാര്‍ കലയത്ത്

ജിദ്ദ:ഫലസ്തീനുള്ള ശക്തമായ പിന്തുണ ആവര്‍ത്തിച്ച സഊദി ഭരണാധികാരി സല്‍മാന്‍ രാജാവ് ഈ വിഷയത്തില്‍ യൂറോപ്യന്‍ യൂനിയന്റെ അനുകൂല നിലപാടിനെയും അദ്ദേഹം പ്രശംസിച്ചു.ഈജിപ്തില്‍ നടക്കുന്ന പ്രഥമ അറബ് യൂറോപ്യന്‍ യൂനിയന്‍ ഉച്ചകോടിയിലാണു സല്‍മാന്‍ രാജാവ് ഫലസ്തീന്‍ വിഷയത്തില്‍ അറബ് രാജ്യങ്ങളുടെ നിലപാട് ആവര്‍ത്തിച്ചത്.

ഈസ്റ്റ് ജറുസലം തലസ്ഥാനമാക്കി 1967 ലെ അതിര്‍ത്തികള്‍ അടിസ്ഥാനമാക്കി സ്വതന്ത്ര ഫലസ്തീന്‍ രാജ്യം സ്ഥാപിച്ച് ഫലസ്തീന്‍ ജനതക്കുള്ള അവകാശങ്ങള്‍ തിരികെ നല്‍കണമെന്നുള്ള ആവശ്യത്തില്‍ തങ്ങള്‍ ഉറച്ച് നില്‍ക്കുന്നതായി രാജാവ് പറഞ്ഞു. ഫലസ്തീന്‍ പ്രശ്‌നം മിഡിലീസ്റ്റിന്റെ മാത്രം പ്രശ്‌നമല്ലെന്നും മറിച്ച് ആഗോള നില നില്‍പ്പിന്റെ തന്നെ പ്രശ്‌നമാണെന്നും രാജാവ് ഓര്‍മിപ്പിച്ചു.തീവ്രവാദത്തിന്റെ ഇരകളില്‍ ഒന്നാമത്തെ രാജ്യമാണ് സഊദി. അതിനാല്‍ തന്നെ തീവ്രവാദത്തെ ചെറുക്കുന്നതിലും സഊദി എന്നും മുന്‍നിരയിലാണ്. തീവ്രവാദത്തിന് ധനസഹായം ലഭിക്കുന്നതിനും സഊദി സാധ്യമായത് ചെയ്യുന്നു. ഈ രംഗത്തെ അന്താരാഷ്ട്ര വേദികളോട് സഊദി പൂര്‍വാധികം സഹകരിക്കും. യമന്‍ പ്രശ്‌നം സ്വീഡന്‍ ഒത്തുതീര്‍പ്പിന്റെയും യു.എന്‍ കരാറിന്റെയും അടിസ്ഥാനത്തില്‍ പരിഹരിക്കണം. യമനിലെ വിഘടന വാദികള്‍ക്ക് ഇറാന്‍ നല്‍കുന്ന പിന്തുണ അവസാനിപ്പിക്കണം. മേഖലയിലെ രാജ്യങ്ങളുടെ ആഭ്യന്തര വിഷയങ്ങളില്‍ ഇടപെടുന്നത് ഇറാന്‍ അവസാനിപ്പിക്കണമെന്നും രാജാവ് ആവശ്യപ്പെട്ടു. രണ്ടു ദിവസമായി ഈജിപ്തിലെ ശാം അല്‍ശൈഖില്‍ നടന്ന അറബ് യൂറോപ്യന്‍ ഉച്ചകോടി. വാണിജ്യം, ഊര്‍ജം, ശാസ്ത്രം, സാങ്കേതികം, ഐടി, ടൂറിസം, കൃഷി തുടങ്ങിയ മേഖലകളില്‍ സഹകരണം മെച്ചപ്പെടുത്താന്‍ തീരുമാനിച്ച ഉച്ചകോടി അംഗരാജ്യങ്ങളിലെ തൊഴിലില്ലായ്മാ നിരക്ക് കുറയ്ക്കാന്‍ പരസ്പര സഹകരണം വര്‍ധിപ്പിക്കാനും തീരുമാനിച്ചു.

സിറിയ, ലിബിയ, യമന്‍ എന്നീ രാജ്യങ്ങളിലെ പ്രശ്‌നങ്ങള്‍ക്ക് പരിഹാരം കാണാനുള്ള ഐക്യരാഷ്ട്ര സഭയുടെ നീക്കങ്ങള്‍ക്ക് ഉച്ചകോടി പൂര്‍ണ പിന്തുണ പ്രഖ്യാപിച്ചു. ഭീകരവാദ പ്രവര്‍ത്തനങ്ങളെ നേരിടാന്‍ പരസ്പര സഹകരണം വര്‍ദ്ധിപ്പിക്കാന്‍ തീരുമാനിച്ച ഉച്ചകോടി ഭീകരവാദ പ്രവര്‍ത്തനങ്ങള്‍ക്ക് രാഷ്ട്രീയസാമ്പത്തികസൈനിക സഹായം ചെയ്യുന്നവരെ ഒറ്റപ്പെടുത്താനും തീരുമാനിച്ചു. അറബ് യൂറോപ്യന്‍ ഉച്ചകോടി ഇരു മേഖലകളിലുമായി ഭാവിയിലും തുടരും. 2022 ല്‍ ബ്രസല്‍സിലായിരിക്കും അടുത്ത ഉച്ചകോടി.

സഊദിയില്‍ നിന്നുള്ള സംഘത്തെ ഭരണാധികാരി സല്‍മാന്‍ രാജാവ് ആണ് നയിച്ചിരുന്നത്. കുവൈത്ത് അമീര്‍, സൈപ്രസ് പ്രസിഡന്റ്, ബെല്‍ജിയം പ്രസിഡന്റ്, ബഹ്‌റൈന്‍ രാജാവ്, ജര്‍മന്‍ ചാന്‍സലര്‍ ആംഗല മെര്‍ക്കലും, ബ്രിട്ടീഷ് പ്രധാനമന്ത്രി തെരേസ മെയും ഉള്‍പ്പെടെ ഇരുപതിലധികം യൂറോപ്യന്‍ രാജ്യങ്ങളുടെ തലവന്മാരും ഉച്ചകോടിയില്‍ പങ്കെടുത്തു. ചെക്ക് പ്രധാനമന്ത്രി തുടങ്ങിയ രാഷ്ട്ര നേതാക്കള്‍ രാജാവുമായി പ്രത്യേകം കൂടിക്കാഴ്ച നടത്തി.