എരുമപ്പെട്ടി: എരുമപ്പെട്ടിയില്‍ ബസില്‍ മാല കവരാന്‍ ശ്രമിച്ച യുവതിയെ യാത്രക്കാരും നാട്ടുകാരും ചേര്‍ന്ന് പിടികൂടി പൊലിസില്‍ ഏല്‍പ്പിച്ചു. തമിഴ്‌നാട് സ്വദേശിനി കസ്തൂരിയാണ് എരുമപ്പെട്ടി പൊലിസിന്റെ കസ്റ്റഡിയിലായത്. കുന്നംകുളം-വടക്കാഞ്ചേരി റൂട്ടിലോടുന്ന സ്വകാര്യ ബസിലാണ് മോഷണ ശ്രമം നടന്നത്. മങ്ങാട് സെന്ററിന് സമീപം വച്ച് യാത്രക്കാരിയുടെ മാലപൊട്ടിക്കാന്‍ ശ്രമിക്കുകയായിരുന്നു. ശ്രദ്ധയില്‍പെട്ട യാത്രക്കാരി ബഹളം വച്ചതോടെ ബസ് നിര്‍ത്തുകയും ഇതിനിടയില്‍ യുവതി ഓടി രക്ഷപ്പെടാന്‍ ശ്രമിക്കുകയും ചെയ്തു. യാത്രക്കാരും നാട്ടുകാരും ചേര്‍ന്ന് യുവതിയെ പിടികൂടുകയും എരുമപ്പെട്ടി പൊലിസിന് കൈമാറുകയുമായിരുന്നു.കഴിഞ്ഞ ദിവസം വയോധികയായ നെല്ലുവായ് മുരിങ്ങത്തേരി പുലിയേടത്ത് സരോജിനിയുടെ മൂന്നര പവന്റെ സ്വര്‍ണമാല കവര്‍ന്ന സംഘത്തിലെ കണ്ണിയാണ് യുവതിയെന്ന് സംശയമുണ്ട്. ഉത്രാളിക്കാവ് പൂരം കണ്ട് മടങ്ങുന്നതിനിടയിലാണ് ബസില്‍ വച്ച് സരോജിനിയുടെ മാല കവര്‍ന്നത്. വടക്കാഞ്ചേരി പൊലിസില്‍ പരാതി നല്‍കിയിട്ടുണ്ട്.