തിരുവനന്തപുരം: ക്യാംപ് ഫോളോവേഴ്‌സായി നിയോഗിക്കപ്പെട്ടവരെ ഉപയോഗിച്ച് വീട്ടുജോലി ചെയ്യിച്ചെന്ന് ആരോപണം ഉയര്‍ന്നതിന് പിന്നാലെ ആംഡ് പൊലിസ് ബറ്റാലിയന്‍ ഡെപ്യൂട്ടി കമാന്‍ഡന്റ് പി.വി രാജുവിനെതിരേ ഡി.ജി.പിക്ക് പരാതി. ക്യാംപ് ഫോളോവേഴ്‌സിലെ ദിവസക്കൂലിക്കാരായ രണ്ട് പൊലിസുകാരാണ് പരാതി നല്‍കിയത്. രാജുവിനെതിരേ നേരത്തെ ആരോപണം ഉയര്‍ന്നെങ്കിലും പരാതി ലഭിച്ചിരുന്നില്ല. രാജുവിന്റെ കുടപ്പനക്കുന്നിലെ വീട്ടില്‍ ടൈല്‍സ് പാകാനായി നാല് പേരെ നിയോഗിച്ചെന്നാണ് പരാതി.
ഇവര്‍ ജോലിചെയ്യുന്നതിന്റെ ദൃശ്യങ്ങളും ഡി.ജി.പിക്ക് നല്‍കിയ പരാതിക്കൊപ്പമുണ്ട്. രണ്ട് ദിവസം മുന്‍പാണ് സംഭവം നടന്നത്. അന്ന് ഉച്ചക്ക് മൂന്ന് വരെ ജോലി ചെയ്‌തെന്നും പൊലിസിലെ ദാസ്യപ്പണി വിവാദം പുറത്തുവന്നതോടെ തങ്ങളെ പറഞ്ഞു വിടുകയായിരുന്നെന്നും പരാതിയില്‍ പറയുന്നു. അതേസമയം, ആരോപണം രാജു നിഷേധിച്ചു. എസ്.എ.പി ക്യാംപിലെ ദിവസ വേതനക്കാരെ വീട്ടില്‍ ജോലിക്ക് ഉപയോഗിച്ചിട്ടില്ലെന്ന് അദ്ദേഹം പറഞ്ഞു.