വാഴക്കാട്: മലപ്പുറം മണ്ഡലം ഉപതെരഞ്ഞെടുപ്പ് യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടിയുടെ പര്യടനത്തിനിടെ വാഴക്കാട്ട് സംഘര്‍ഷം. കുഞ്ഞാലിക്കുട്ടിയുടെ അകമ്പടിയ വാഹനങ്ങള്‍ക്ക് നേരെ ഇടത് മുന്നണിയുടെ പ്രവര്‍ത്തകര്‍  ആക്രമണം നടത്തിയതാണ് സംഘര്‍ഷത്തിന് കാരണമായത്. എടവണ്ണപ്പാറയില്‍ നിന്നും തുടങ്ങിയ വാഴക്കാട് പഞ്ചായത്തിലെ പര്യടനം ചീനീബസാര്‍ കഴിഞ്ഞ് ഒല്‍പംകടവിലേക്ക് നീങ്ങുന്നതിനിടയിലാണ് സംഘര്‍ഷമുണ്ടായത്.

ഇടത് മുന്നണിയുടെ പ്രഗത്ഭരായ നേതാക്കള്‍ പങ്കെടുക്കുന്ന പൊതുയോഗം വാഴക്കാട്ട് നടന്നുകൊണ്ടിരിക്കെയാണ് വേദിക്കരികില്‍ സംഘര്‍ഷം നടന്നത്. കുഞ്ഞാലിക്കുട്ടി കടന്നുപോകുന്നതിനിടെ പ്രവര്‍ത്തകരെ ആവേശമാക്കുന്ന രീതിയില്‍ കുഞ്ഞാലിക്കുട്ടിക്കെതിരെ യുവ നേതാവ് പ്രസംഗിച്ചെന്നും ഇത്  സംഘര്‍ഷത്തിന് ആക്കം കൂട്ടിയെന്നും ആക്ഷേപമുണ്ട്. സംഘര്‍ഷത്തില്‍ എട്ടോളം പ്രവര്‍ത്തകര്‍ക്ക് പരുക്കേറ്റു. അക്രമത്തില്‍ പരുക്കേറ്റ തസ്‌നീം ഊര്‍ക്കടവിനെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചിട്ടുണ്ട്. അക്രമത്തില്‍ യു.ഡി.എഫ്, മുസ്‌ലിം ലീഗ്, യൂത്ത്‌ലീഗ് പ്രതിഷേധിച്ചു.