ഗാന്ധിനഗര്‍ (കോട്ടയം): പനി ബാധിച്ച് ചികിത്സയിലിരിക്കേ മരിച്ച ആദിവാസി വീട്ടമ്മയുടെ മൃതദേഹം കൊവിഡ് 19 സംശയത്തെ തുടര്‍ന്ന് തീവ്രപരിചരണ വിഭാഗത്തില്‍ സൂക്ഷിച്ചത് എട്ടു മണിക്കൂര്‍.
വ്യാഴാഴ്ച വൈകുന്നേരം 6.30ന് കോട്ടയം മെഡിക്കല്‍ കോളജ് ആശുപത്രിയിലെ മെഡിസിന്‍ ക്രിട്ടിക്കല്‍ കെയര്‍ യൂണിറ്റില്‍ ചികിത്സയില്‍ കഴിയവേ മരിച്ച ഇടുക്കി മാങ്കുളം സ്വദേശിനിയും ആദിവാസിയുമായ വനിത (26) എന്ന വീട്ടമ്മയുടെ മൃതദേഹത്തിനായിരുന്നു ഈ ഗതികേട്. കടുത്ത പനിയെ തുടര്‍ന്ന് ഒരാഴ്ച മുന്‍പാണ് ഇവരെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്.
ചികിത്സയില്‍ കഴിയുന്നതിനിടയില്‍ കോവിഡ് 19 സംശയം തോന്നിയ ഡോക്ടര്‍മാര്‍ ഇവരുടെ രക്ത, സ്രവ സാംപിളുകള്‍ ശേഖരിച്ച് പരിശോധനക്കു അയച്ചിരുന്നു. എട്ടു മണിക്കൂര്‍ ആയിട്ടും പരിശോധനാ ഫലം വരികയോ, മൃതദേഹം മോര്‍ച്ചറിയിക്കു മാറ്റുകയോ ചെയ്യാതിരുന്നതില്‍ ബന്ധുക്കളും മറ്റു രോഗികളും ഉള്‍പ്പെടെയുള്ളവര്‍ പ്രതിഷേധിച്ചിരുന്നു. വെള്ളിയാഴ്ച രാവിലെ പരിശോധനാ ഫലം നെഗറ്റീവ് ആണെന്ന് അറിയുകയും തുടര്‍ന്ന് മൃതദേഹം ബന്ധുക്കള്‍ക്ക് വിട്ടുനല്‍കുകയുമായിരുന്നു.