മോസ്‌കോ: ഗ്രൂപ്പ് ബിയിലെ മൂന്നാം മത്സരത്തില്‍ ഇന്ന് പോര്‍ച്ചുഗല്‍ മൊറോക്കോയെ നേരിടും. മോസ്‌കോയിലെ ലുസ്‌നിക്കി സ്റ്റേഡിയത്തില്‍ ഇന്ത്യന്‍ സമയം വൈകിട്ട് 5.30നാണ് മത്സരം. കഴിഞ്ഞ മത്സരത്തില്‍ ശക്തരായ സ്‌പെയിനിനെ 3-3 സമനിലയില്‍ കുരുക്കിയ പോര്‍ച്ചുഗല്‍ മൊറോക്കോക്ക് ശക്തമായ വെല്ലുവിളി ഉയര്‍ത്തുന്നുണ്ട്. ക്യാപ്റ്റന്‍ ക്രിസ്റ്റ്യാനോ റൊണാള്‍ഡോയുടെ ഹാട്രിക് മികവിലാണ് പോര്‍ച്ചുഗല്‍ സ്‌പെയിനിനെ ഒപ്പംപിടിച്ചത്. 

കഴിഞ്ഞ മത്സരത്തില്‍ ഇറാനോടേറ്റ അപ്രതീക്ഷിത പരാജയത്തില്‍ നിന്ന് മൊറോക്കോ പൂര്‍ണമായും മുക്തരായിട്ടില്ല. 91ാം മിനുട്ടില്‍ വീണ സെല്‍ഫ് ഗോളിലാണ് ഇറാന് മുന്‍പില്‍ മൊറോക്കോ പരാജയപ്പെട്ടത്. പോര്‍ച്ചുഗലിനെ അട്ടിമറിച്ച് പരാജയ ഭാരം കുറക്കാനായിരിക്കും മൊറോക്കോയുടെ ശ്രമം. ഗ്രൂപ്പ് ബിയില്‍ അവസാന സ്ഥാനക്കാരാണ് മൊറോക്കോ. ഇന്ന് മൊറോക്കോയെ പരാജപ്പെടുത്തിയില്ലെങ്കില്‍ പോര്‍ച്ചുഗലിന്റെ പ്രീക്വാര്‍ട്ടര്‍ സാധ്യതകള്‍ മങ്ങും.
ഗ്രൂപ്പ് ബിയിലെ നാലാം മത്സരത്തില്‍ സ്‌പെയിന്‍ ഇറാനിനെ നേരിടും. ഇന്ത്യന്‍ സമയം രാത്രി 11.30ന് കാസന്‍ അരീന സ്റ്റേഡിയത്തിലാണ് മത്സരം. ആദ്യ മത്സരത്തില്‍ സമനില വഴങ്ങിയ സ്‌പെയിനിനും ഇന്ന് ജയം അനിവാര്യമാണ്. ഇറാന്റെ പ്രതിരോധ ഫുട്‌ബോളിനെ ഇസ്‌കോയുടേയും ഇനിയേസ്റ്റയുടേയും മധ്യനിര കരുത്ത് കൊണ്ടായിരിക്കും സ്‌പെയിന്‍ നേരിടുന്നത്. ഗ്രൂപ്പില്‍ ഒന്നാം സ്ഥാനക്കാരാണ് ഇറാന്‍. രണ്ടാം സ്ഥാനത്തുള്ള പോര്‍ച്ചുഗലും സ്‌പെയിനും ഇന്ന് രണ്ടും കല്‍പിച്ചാണ് കളത്തിലിറങ്ങുന്നത്.