എരുമപ്പെട്ടി: പാഴിയോട്ടുമുറി കുടക്കുഴി ചെമ്പ്രയൂര്‍ നരസിംഹമൂര്‍ത്തി ക്ഷേത്രത്തില്‍ ലോക്ക് ഡൗണ്‍ ലംഘിച്ച് ഭാഗവത പാരായണം നടത്താന്‍ ഒത്തുകൂടിയ ബി.ജെ.പി നേതാവും പൂജാരിയും ഉള്‍പ്പെടെ ഏഴു പേര്‍ക്കെതിരേ എരുമപ്പെട്ടി പൊലിസ് കേസെടുത്തു. ഇതില്‍ നാലു പേരെ അറസ്റ്റ് ചെയ്തു.
ബി.ജെ.പി സംസ്ഥാന കൗണ്‍സില്‍ അംഗം ഇ. ചന്ദ്രന്‍ (68), തെക്കേടത്ത് മന നാരായണന്‍ (47), കിഴക്കേ പുരയ്ക്കല്‍ ഗോപി(58), താഴത്തേ പുരയ്ക്കല്‍ സുധനന്‍ (60) എന്നിവരെയാണ് ഇന്‍സ്‌പെക്ടര്‍ കെ.കെ ഭൂപേഷിന്റെ നേതൃത്വത്തില്‍ അറസ്റ്റ് ചെയ്തത്. കൊവിഡ് നിയന്ത്രണങ്ങള്‍ ലംഘിച്ച് ഇന്നലെ രാവിലെ ക്ഷേത്രത്തില്‍ ഭാഗവത പാരായണം നടത്തുന്നുണ്ടെന്ന വിവരം ലഭിച്ചതിന്റെ അടിസ്ഥാനത്തിലാണ് പൊലിസ് പരിശോധന നടത്തിയത്.
പൊലിസ് എത്തുമ്പോള്‍ പൂജാരി ഉള്‍പ്പടെ മൊത്തം ഏഴു പേരാണ് ക്ഷേത്രത്തിലുണ്ടായിരുന്നത്. അതില്‍ രണ്ടു പേര്‍ ഓടിപ്പോയതായി പൊലിസ് പറയുന്നു. അറസ്റ്റിലായവര്‍ക്കു പുറമെ പൂജാരി രാമനും കണ്ടാലറിയാവുന്ന രണ്ടു പേര്‍ക്കുമെതിരേയും കേസെടുത്തിട്ടുണ്ട്. അതേസമയം ക്ഷേത്രത്തില്‍ ഭാഗവത സപ്താഹം നടത്തിയെന്നും ചില മാധ്യമങ്ങളില്‍ വന്ന വാര്‍ത്ത അടിസ്ഥാനരഹിതമാണെന്ന് ക്ഷേത്ര കമ്മറ്റി സെക്രട്ടറി കെ.ബി സനൂപ് വാര്‍ത്താക്കുറിപ്പില്‍ അറിയിച്ചു.