മട്ടാഞ്ചേരി: ലക്ഷദ്വീപ് യാത്രാ കപ്പലുകളായ  അറേബ്യന്‍ സീയും എം.വി കവരത്തിയും   കൊച്ചി തുറമുഖത്തെത്തി. അറേബ്യന്‍ സീ ഇന്നലെ രാവിലെ ഏഴിനും എം.വി കവരത്തി വൈകിട്ട് മൂന്നിനുമാണ് കൊച്ചിയിലെത്തിയത്. 129 പേര്‍ കപ്പലുകളിലുണ്ടായിരുന്നു. അറേബ്യന്‍ സീയില്‍ 96ഉം, എം.വി കവരത്തിയില്‍ 33ഉം യാത്രക്കാരാണ് ഉണ്ടായിരുന്നത്. അറേബ്യന്‍ സീയിലെ യാത്രക്കാരില്‍ എട്ടുപേര്‍ ചികത്സയ്ക്കായി എത്തിയവരാണ്. നാലുപേര്‍ ഇതര സംസ്ഥാനക്കാരാണ്. ഇതില്‍ രണ്ടുപേര്‍ ആന്ധ്രയില്‍ നിന്നുള്ളവരാണ്. ലക്ഷദ്വീപ് ഹൗസില്‍ നിരീക്ഷണത്തിലുള്ള ഇവര്‍ക്ക് നാട്ടിലേക്ക് മടങ്ങുന്നതിന് ആന്ധ്ര സര്‍ക്കാരിന്റെ പാസ് ലഭിച്ചിട്ടുണ്ട്. കൊച്ചിയില്‍ നിന്നുള്ള അനുമതി കൂടി കിട്ടിയാല്‍ നാട്ടിലേക്ക് മടങ്ങും.തമിഴ്‌നാട് സ്വദേശിയെ മാല ദ്വീപില്‍നിന്ന് തമിഴ്‌നാട്ടിലുള്ളവരെ കൊണ്ടുപോകാനായി എത്തിയ ബസില്‍ നാട്ടിലേക്ക് അയച്ചു. എറണാകുളം വൈറ്റിലയില്‍ വാടകയ്ക്ക് താമസിക്കുന്ന യു.പി  ഗാസിയബാദ് സ്വദേശിയെ വീട്ടില്‍ കയറ്റില്ലെന്ന് ഉടമ അറിയിച്ചതിനെ തുടര്‍ന്ന് അധികൃതര്‍ക്ക് ഇടപെടേണ്ടി വന്നു. എം.വി കവരത്തിയില്‍ 33 യാത്രക്കാരാണുണ്ടായത്.