തൊടുപുഴ: 1989 മുതല്‍ കോതമംഗലത്തു പ്രവര്‍ത്തിച്ചുവരുന്ന റബര്‍ ബോര്‍ഡിന്റെ റീജ്യനല്‍ ഓഫിസ് നിര്‍ത്താനുള്ള തീരുമാനം പുനഃപരിശോധിക്കണമെന്ന് അഡ്വ. ജോയ്‌സ് ജോര്‍ജ് എം.പി പാര്‍ലമെന്റില്‍ ആവശ്യപ്പെട്ടു.
ഈ പ്രദേശത്തെ 95 ശതമാനം ജനങ്ങളും റബര്‍ കര്‍ഷകരാണ്. 23000 ഹെക്ടര്‍ സ്ഥലത്താണ് ഇവിടെ റബര്‍ കൃഷി നടന്നു വരുന്നത്. 67 പ്രാദേശിക റബര്‍ സൊസൈറ്റികളും റീജ്യനല്‍ ഓഫിസിനു കീഴില്‍ പ്രവര്‍ത്തിക്കുന്നുണ്ട്. 13000 ഹെക്ടര്‍ സ്ഥലത്ത് ഗോത്രവര്‍ഗ്ഗ ജനവിഭാഗം റബര്‍ കൃഷി ചെയ്യുന്നുണ്ടെന്ന് എം.പി പാര്‍ലമെന്റില്‍ ചൂണ്ടിക്കാണിച്ചു.
മഹാത്മാഗാന്ധി ഗ്രാമീണ തൊഴിലുറപ്പു പദ്ധതിയിലുള്‍പ്പെടുത്തി റബര്‍ കൃഷിയെ പ്രോത്സാഹിപ്പിക്കുന്നതിനുള്ള നടപടികളും നടന്നു വരുന്നുണ്ട്.
റബര്‍ കൃഷിയെ ജീവനോപാധിയായി സ്വീകരിച്ചിട്ടുള്ള കര്‍ഷകര്‍ക്ക് ബുദ്ധിമുട്ടുകള്‍ സൃഷ്ടിക്കുന്ന തീരുമാനത്തില്‍ നിന്നും കേന്ദ്ര സര്‍ക്കാര്‍ പിന്തിരിയണമെന്നും റബര്‍ കര്‍ഷകരെ സഹായിക്കുന്നതിനായി റീജ്യനല്‍ ഓഫിസിന്റെ പ്രവര്‍ത്തനം നിലനിര്‍ത്തണമെന്നും എം.പി ആവശ്യപ്പെട്ടു. പാര്‍ലമെന്റ് ചട്ടം 377 പ്രകാരമാണ് ജോയ്‌സ് ജോര്‍ജ്  ഈ ആവശ്യം ലോക്‌സഭയിലുന്നയിച്ചത്.