ബസുകളുടെ മത്സരയോട്ടം അപകടങ്ങള്‍ക്ക് കാരണമാകുന്നു
മറികടക്കുന്നതിനിടെ സ്വകാര്യബസ് കെ.എസ്.ആര്‍.ടി.സിയിലിടിച്ചു
നടവയല്‍: കെ.എസ്.ആര്‍.ടി.സി-സ്വകാര്യബസുകള്‍ കിടമത്സരം നിലനില്‍ക്കുന്ന പനമരം-കേണിച്ചിറ സുല്‍ത്താന്‍ ബത്തേരി റൂട്ടില്‍ യാത്രക്കാര്‍ക്ക് ചങ്കിടിക്കും യാത്ര. സമയക്രമം പോലും പാലിക്കാതെയുള്ള ബസുകളുടെ മത്സരയോട്ടം മിക്കദിവസങ്ങളിലും റൂട്ടില്‍ അപകടങ്ങള്‍ക്കും കാരണമാകുന്നുണ്ട്.
കഴിഞ്ഞ ദിവസം സ്വകാര്യബസ് മറികടക്കുന്നതിനിടെ കെ.എസ്.ആര്‍.ടി.സി ബസിലിടിച്ചിരുന്നു. നടവയല്‍ ഹൈസ്‌കൂള്‍ റോഡിലെ വളവില്‍ വെച്ചായിരുന്നു അപകടം. രാവിലെ ആയതിനാല്‍ ബസുകളില്‍ യാത്രക്കാര്‍ കുറവായതാണ് ദുരന്തം ഒഴിവായത്. അപകടത്തെ തുടര്‍ന്ന് റോഡില്‍ ഗതാഗതം സ്തംഭിച്ചിരുന്നു. തുടര്‍ന്ന് പനമരം കേണിച്ചിറ സ്റ്റേഷനുകളില്‍ നിന്ന് പൊലിസ് എത്തിയാണ് ബസുകള്‍ മാറ്റിയത്.
അപകടങ്ങള്‍ തുടര്‍ക്കഥയായിട്ടും യാത്രക്കാരുടെ ജീവന്‍ പണയം വെച്ചുള്ള ബസുകാരുടെ മത്സര ഓട്ടം തടയുന്നതിന് പൊലിസോ മോട്ടോര്‍ വാഹന വകുപ്പോ യാതൊരു നടപടിയും ഇതുവരെ സ്വീകരിച്ചിട്ടില്ല. സ്വകാര്യ ബസുകളുടെ കുത്തക റൂട്ടായിരുന്ന മാനന്തവാടി-പനമരം-സുല്‍ത്താന്‍ ബത്തേരി റൂട്ടില്‍ കോടതി ഉത്തരവിനെ തുടര്‍ന്ന് കെ.എസ്.ആര്‍.ടി.സി ബസുകള്‍ സര്‍വീസ് നടത്താന്‍ ആരംഭിച്ചതോടെയാണ് റൂട്ടില്‍ പ്രശ്‌നങ്ങള്‍ തുടങ്ങിയത്. കെ.എസ്.ആര്‍.ടി.സി സര്‍വിസിനെ തകര്‍ക്കാന്‍ സ്വകാര്യ ബസ് ലോബികളും രംഗത്ത് എത്തി. സര്‍ക്കാര്‍ ബസുകളുടെ മുന്നിലും പുറകിലുമായി സ്വകാര്യ ബസുകള്‍ സര്‍വിസ് നടത്തി വരുമാനം കുറക്കുക എന്ന ലക്ഷ്യമായിരുന്നു ഇതിന് പിന്നില്‍.
തുടര്‍ന്ന് നടവയല്‍ കേണിച്ചിറ പ്രദേശത്തെ ബസ് പാസഞ്ചേഴ്‌സ് അസോസിയേഷനുകള്‍  ഇടപെട്ടാണ് ബസുകള്‍ക്ക് സമയക്രമം ഉണ്ടാക്കി നല്‍കിയത്. കുറച്ച് കാലം സ്വകാര്യ ബസുകള്‍ സമയക്രമം പാലിച്ചങ്കിലും വീണ്ടും ഇത് തെറ്റിച്ചു മത്സരയോട്ടം ആരംഭിച്ചിരിക്കുകയാണ്.
കേണിച്ചിറ ടൗണില്‍ പൊലിസ് ബസുകളുടെ സമയക്രമം പാലിക്കുന്നതിന് പഞ്ചിങ് സ്റ്റേഷന്‍ തുടങ്ങിയിരുന്നു. എന്നാല്‍ ഇവിടെ സമയം രേഖപെടുത്തിയാലും സ്വകാര്യ ബസുകള്‍ അമിത വേഗത്തില്‍ എത്തി കെ.എസ്.ആര്‍.ടി.സിയെ മറികടക്കാനുളള ശ്രമങ്ങളാണ് നടത്തുന്നത് .
ബസ്സുകളുടെ ഈ അമിത വേഗതയാണ് പലപ്പോഴും അപകടങ്ങള്‍ക്ക് കാരണമാകുന്നതെന്ന്  നാട്ടുകാര്‍ പറയുന്നു. ഇത്തരത്തില്‍ ബത്തേരിയില്‍ നിന്നും പുറപ്പെട്ട കെ.എസ്.ആര്‍.ടി.സി ബസിന്റെ പുറകില്‍ വന്ന സ്വകാര്യ ബസ് മറികടക്കാനുള്ള ശ്രമത്തിലാണ് കഴിഞ്ഞദിവസം അപകടമുണ്ടായത്.
ബസുകളുടെ അമിതവേഗതയും മത്സര ഓട്ടവും അവസാനിപ്പിക്കണമെന്നാവശ്യപ്പെട്ട് നാട്ടുകാരും രംഗത്തെത്തിയതോടെ ചെറിയ ബഹളത്തിന് കാരണമായി. സമയക്രമം പാലിച്ചാല്‍ പ്രശ്‌നങ്ങള്‍ക്ക് പരിഹാരമാകുമെന്നിരിക്കെ ഇതിനുള്ള നടപടി സ്വീകരിക്കാന്‍ ബന്ധപ്പെട്ട അധികൃതര്‍ തയാറാകണമെന്ന ആവശ്യം ഇതോടെ ശക്തമാകുകയാണ്.