തിരുവനന്തപുരം: കെ.ടി.ഡി.സിക്ക് കീഴിലുള്ള വേളി ടൂറിസ്റ്റ് വില്ലേജിലെ ഫ്‌ലോട്ടിങ് റെസ്‌റ്റോറന്റ് വെള്ളത്തില്‍ താഴ്ന്നു. ലോക്ക്ഡൗണ്‍ കാലത്ത് അടച്ചിട്ടിരിക്കുകയായിരുന്നു. ഇതായിരിക്കാം മുങ്ങാനുള്ള കാരണമെന്ന് കരുതുന്നു. രണ്ട് നിലയുള്ള റെസ്റ്റോറന്റിന്റെ ഒന്നാം നില പൂര്‍ണമായും വെള്ളത്തില്‍ മുങ്ങിയ നിലയിലാണ്.

ആറു മാസം മുന്‍പ് 75 ലക്ഷം രൂപ ചെലവിട്ട് നവീകരിച്ച ഭക്ഷണശാലായിരുന്നു ഇത്. കായലില്‍ പൊങ്ങിനില്‍ക്കുന്ന ഈ റെസ്‌റ്റോറന്റ് വേളിയിലെ പ്രധാന ആകര്‍ഷണങ്ങളിലൊന്നായിരുന്നു. ഒരേസമയം 100 പേര്‍ക്ക് ഇരുന്ന് ഭക്ഷണം കഴിക്കാനുള്ള സൗകര്യമുണ്ടായിരുന്നു.

സംഭവമറിഞ്ഞ് കെ.ടി.ഡി.സി അധികൃതര്‍ സ്ഥലത്തെത്തി. മഴ പെയ്ത് കായലിലേക്ക് വെള്ളം ഇരച്ചെത്തിയതാണ് മുങ്ങാന്‍ കാരണമെന്ന് അധികൃതര്‍ പറയുന്നു.